Guwahti, Jylliew:
Ki bor sorkar jong ka jylla Assam ha ka 30 tarik u Jymmang ki la pyntip ba uwei u nongtrei pahara ka tnat khlaw jong ka jylla Assam u la duh ei ïa la ka jong ka jingim bad 3 ngut kiwei pat ki la ïoh ïa ki jingmynsaw hadien ka jingshah thombor ha kawei ka kynhun runar kaba ju don bynta ha ki kam ban khaïi beaiñ ïa ki dieng. Katei ka jingjia shah thombor ka la jia ha kawei ka khlaw kaba don ha ka thaiñ Bor Matia (Krishnai Forest Range Office), Goalpara district.
Kat kum ki jingïoh lum khubor la ïathuh ba katei ka jingjia ka la jia ha ka por ba ka kynhun ki nongtrei ka tnat khlaw ki dang don ha la ka jong ka kamram ban leit kurup ïa kawei ka kali ‘tractor’ kaba pynkit beaiñ ïa ki dieng.
Hadien ka jingïoh jingtip shaphang katei ka jingjia, la ïathuh ba na ka liang ka kynhun pulit ka la leit mar mar sha katei ka jaka ban ïoh lad ruh ban pyllait im ïa ki nongtrei ka tnat khlaw kiba la mynsaw.
Ki 3 ngut kiwei pat ki nongtrei jong ka tnat khlaw kiba la ïoh ïa ki jingmynsaw kiba jur ki kynthup ïa u Mobinur Rahman, Najrul Islam, bad u Mustafa Ali. Ïa kitei ki 3 ngut la leit ban rah sumar noh sha Gauhati Medical College and Hospital (GMCH).
Kat kum ki jingïoh lum khubor la ïathuh ba u nongtrei ka tnat khlaw u ba la duh ei ïa la ka jong ka jingim na katei ka jingjia u dei u ba la tip kyrteng kum u Rajbir Ahmed.
Hadien katei ka jingjia, na ka liang u MLA ka thaiñ – Abul Kalam Rasheed Alam u la dawa na ka sorkar jylla ba ka dei ban pynlong da ka jingtohkit kaba bniah halor katei ka jingjia bad kumjuh ruh ban ai da ka jingpynshitom kaba tyngeh pyrshah ïa ki runar kiba donkti ha katei ka kam beaiñ. Na ka liang u MLA u la dawa ruh na ka sorkar jylla ba ka dei ban pynbiang da ka lad jingïarap kaba T.20 lak sha ka longïing jong u Rajbir Ahmed u ba la duh ei ïa la ka jong ka jingim na katei ka jingjia.
Haba phai sha kawei pat ka khubor la ïathuh ba ha ka 31 tarik u Jymmang na ka liang ki bor pulit jong ka jylla ki la ïoh ban kem noh ïa ki 8 ngut ki runar kiba la donkti ha katei ka kam bymman. Ki 8 ngut ki runar kiba la shah kem ha katei ka sngi ki kynthup ïa u Bhadreswar Rabha, Mohen Rabha, Dulal Rabha, Suraj Rabha, Prahlad Rabha, Ananda Rabha, Prafulla Rabha, bad u Rajni Rabha. Ïa kitei ki runar la leit ban set ha Dudhnoi Police Station kaba don ha Goalpara district.
