Jowai, Jylliew:
Ki 11 ngut ki Waheh Shnong ka thaiñ Ïooksi Saphai ki la pynshai paidbah ba kim don bynta eiei halor ka jingdawa jong ka Synjuk Ki Waheh Chnong Ri Jaiñtia ban ai bhah 20% ïa ki Jaiñtia hapoh ka Reservation Policy.
“Ngi ai ka jingkyrshan kaba pura ïa u Bah Ardent M Basaiawmoit ha kaba ïadei bad ka jingdawa ban pynthymmai (Review) ïa ka State Job Reservation Policy”, la ong ki 11 ngut ki Waheh Shnong ka thaiñ Ïooksi.
Ki la ong ba kane kam dei shuh ka por jong ka jingïasngewpher thaiñ ne ka jingïapharia ïa ka jaitbynriew hynrei ka dei ka por jong ka jingïatylli na ka bynta ban ïakhun ïa ki jingeh jong ka jaitbynriew.
Shuh shuh ki la ong, ka kyrteng Jaiñtia kam dei ka kyrteng ka jaitbynriew hynrei ka dei ka kyrteng ka thaiñ, bad la dei ban sngewthuh ruh ba ha Jaiñtia la kynthup lang ïa baroh kiwei pat ki jaitbynriew kum ki Biate, ki Karbi bad kiwei kiwei bad ngim lah ruh ban kyntait da lei lei ruh ïa ki kum ki nong Jaiñtia ba pura.
Nalorkata, ki la pynkynmaw ba ka jaitbynriew ka la mad ïa ka jingshah pharia ha ki por ka sorkar Phareng ha kaba ki la pyndonkam ïa ka ‘Divide and Rule Policy’ hynrei ka jingthmu jong u Phareng, kam lah ban pharia ïa ka jaitbynriew namar ki don ïa ka jingkheiñ kur kaba shkem bad kaba don nongrim.
Ym lah ban pynïakhlad ïa ka jingïadei kur hapdeng ki Chalam na Pnar, ki Shabong na Khynriam bad ki Mukhim na War, nangta ki Laloo na Pnar, ki Lamin na War bad ki Diengdoh na Khynriam ruh ki dang dei shikur, bun kiwei kiwei ki Kur kiba na kylleng ki thaiñ ka Bri U Hynniewtrep kiba dang ïadei shikur.
Shuh shuh kitei ki Waheh Shnong ki la ong ba ym juh don ki kur na ki jaitbynriew Biate kiba la shong la sah ha Jaiñtia ba kin ïadei shi kur bad ki Pnar bad na ka jaitbynriew Karbi ba kin ïa dei shikur bad ki Bhoi na Ri Bhoi District.
Ki Waheh Chnong ka thaiñ Iooksi Saphai, ki la kitbok kitrwiang ruh ïa u Bah Ardent Miller Basaiawmoit ba un nang ïoh ïa ka met kaba shait ba khlaiñ.
