Shillong, Jylliew 02:
Ka tnad pulit ka East Khasi Hills ka la ong ba ka jingdon jong ki kali bad ki ar-shaka kiba shah tuh naduh u snem 2022 haduh mynta ka long 170 tylli.
Na kitei ki 170 tylli, 145 tylli ki kynthup ïa ki ar-shaka bad 25 tylli ki kali.
Ha kajuh ka por, na ki 145 tylli, ka tnad ka la lap biang ïa 33 tylli ki ar-shaka bad 7 tylli ki kali na ki 25 tylli kiba shah tuh.
“Ka jingshah tuh jong ki kali ka kham duna haba ïanujor bad ki ar-shaka. Kane ka dei namarba ki lad jingïada ha ki kali ki la kham bha ha ka liang ki kor ka juk stad teknoliji ba mynta, kata naduh u shabi ba la pyndait ïa ki ‘chip’ bad kiwei-kiwei,” la ong u SP (City), Bah Vivek Syiem ha ka Sngi Thohdieng.
U la ong ruh ba ka jingthmu jong ki runar khamtam haba ki tuh ïa ki ar-shaka, ka long ban leit na kawei ka jaka sha kawei pat bad ban ieh noh ïa ka mar ha kata ka jaka.
“Sa kawei pat ka daw haba ïadei bad ka jingshah tuh jong ki ar-shaka ka long ban die ïa ki sha Bangladesh namar ka jing-heh ïew jong ki (ar-shaka) ha katei ka ri,” u la ong.
U la ïathuh ruh ba ha u snem ba la dep, ka tnad ka la ïoh kurup palat 20 tylli ki ar-shaka ba la shah tuh ba kynthup ïa kito kiba na Assam.
Haba kylli, utei u heh pulit u la ong ba bun ki briew ki buh ïa ki ar-shaka jong ki ha ki surok – kiba long ki jaka ki bym shngaiñ.
“Kawei ruh ka long ba ki briew ki thied kali watla kim biang ki jaka pynïeng bad kumta kim banse ban shu pynïeng ïa ki ha surok,” u la ong.
U la ong ruh ba ka jingbuh ïa ki kali ha surok ha kawei ka liang ka buh jingeh shi kat dei lada don ka jingjia pluh ïing namar ka shem jingeh bha ïa ki kali pynlip ding ban rung sha ki shnong ki thaw.
Na ka liang u Bah Syiem u la ïathuh ba sa kawei na ki daw jong ka jingshah tuh jong ki ar-shaka ka dei namar ka jingjyllei palat ki nongdih drok. Haba kylli halor ki ‘High Security Registration Plate’ (HSRP), u la ong ba kim don ïa kino-kino ki tiar ba la pyndait ha ki (HSRP) kiba lah ban buddien haba shah tuh ki ar-shaka ne ki kali.
“Ki HSRP ki kam pher bad ka kham eh ban pyrthuh ban shna bad ka don ka dak jingshon (punching) ha kaba kiwei ki ‘number plate’ kim don,” u la ong.
Shuh shuh haba kylli halor ki lad ki lynti kiba ka tnad ka ju pyndonkam ban buddien ïa ki ar-shaka bad ki kali ba shah tuh, u SP u la ong, “Ka ‘App’ ba ïadei bad ka ‘E-Challan’ ka ïarap bha ïa ngi. Kano-kano ka kali kaba shah tuh yn hap hi ban pyndonkam bad haba pynlong ïa ka jingtalasi, bunsien ngi lap ba dei ki kali kiba shah tuh bad don ruh kito kiba wan shane na shabar.”
Kumban shu kdew hangne, ki pulit ki la kem ïa 31 ngut ki briew kiba donkti ha ki kam tuh kali.
