Mawkyrwat, Jylliew 02:
U Deputy Commissioner jong ka South West Khasi Hills District u Bah T. Lyngwa, IAS, hadien ka jingïakynduh bad ki nongdie doh jong ka dong ka thaiñ Mawkyrwat lem bad ki doktor na ka tnat ri jingri (Veterinary), u la pynshai ba ka jingpang at ki masi kaba tip kum ka (LSD) ka la ktah haduh 63 tylli ki shnong jong ka distrik baroh kawei. U la ïathuh ruh ba kumba ka long mynta, 5 tylli ki masi ki la ïap na kane ka jingpang.
U Bah Lyngwa u la ïathuh ba hadien ka jingïatai bad ki doktor, la ong ba kane ka jingpang kam don jingktah eiei ïa ka koit ka khiah jong ki briew bad ka dei ka jingpang kaba ïabit tang para masi. Hynrei u la maham pat ïa ki nongdie doh ba kim bit ban ot ïa ki masi kiba pang bad lada ki lap kum kine ki masi ki dei ban pyntip wut wut sha ki doktor khnang ban ïoh ban sumar ïa ki.
U la ïathuh ruh ba kane ka jingpang kam long kaba eh ban sumar bad lada ai dawai ïa ki tang hapoh lai taïew ki masi ki la lah ban koit. Ha kaba ïadei pat bad ki masi ki bym pang u la bthah ruh ba donkam ban ai tika ïa ki khnang ba kan long ka jingïada.
Haba kylli bad ka doh sniang hato ka don jingktah ne em, na ka liang u Bah Lyngwa u la ïathuh ba na ka liang ki doktor ki la pynshai ba kam don jingktah eiei ban bam namar ka dei tang ka jingpang shit bad u la bynrap ruh ba ki nongdie doh ki lah ban die ha ïew ha hat lait noh tang ïa kiba pang.
Ha kawei pat ka liang u Bah Lyngwa u la ai ka jingmaham ïa ki dukan die doh ba katkum ka hukum jong ka High Court la mana ban wah ne thad ïa ka doh kum ki khlieh masi ne khlieh sniang ha ki dukan namar kane ka pyni saitmet ïa ki paidbah nongwan ïew wan hat.
Ha kajuh ka por u la ai ruh ka jingmaham ba ki paidbah kim dei ban bret pathar ïa ki plastik ha ki jaka saitjaiñ, ki lynti syngkien bad ki um ki wah. Ha ka jingïakren bad ki nongdie doh u la ai jingmut ruh ba ki dei ban pyndonkam noh da ki plastik kiba pyut wat la ki kham rem khyndiat bad u la bynrap ruh ba kane lehse kan long ka nuksa kaba bha ïa ki para nongshong ïew khnang ban wanrah ïa ka khuid ka suba ïa ka mariang bad ki sawdong sawkun.
