Imphal, Jylliew:
Ka Manipur unit jong ka seng Shiv Sena, ha ka 1 tarik mynta u bnai ka la ai jingmut ïa ka sorkar Jylla bad kumjuh ruh ïa ka Porkar Pdeng ba ki dei ban pynkut noh ïa ka soskular sangeh ïasiat (suspension of operations) bad ki kynhunj kieng atiar kiba na ka jaitbynriew Kuki.
Na ka liang ki nongïalam ka Manipur Shiv Sena ki la ong ba ka jingpynkut ïa ka soskular bad ki kynhun kieng atiar ka long kaba donkam kyrkieh na ka bynta ban wan rah biang ïa ka shong suk shong saiñ ha ka jylla Manipur.
Ïa katei ka jingai jingmut jong ka seng la pynbna da u president ka Manipur unit jong ka Shiv Sena – M Tombi Singh ha ka jingïalang bad ki lad pathai khubor ba la pynlong ha nongbah Imphal.
Ha ka jingïalang, na ka liang u nongïalam ka Manipur Shiv Sena u la kyntu ruh ïa ki kynhun kieng atiar kiba na ka jaitbynriew Kuki ba kin pynsangeh noh ïa ki kam thombor pyrshah ïa ki paid Meitei. Na ka liang u Tombi u la ban khia ruh halor ka mat kaba ïadei bad ki sienjam kiba ka sorkar ka dei ban trei tyngeh pyrshah ïa ki dkhot seng kieng atiar kiba la donkti ban thombor pyrshah ïa ki paid Meitei kiba shong ba sah ha ka jylla Manipur.
Ha ka jingïalang, na ka liang u Tombi u la pyntip ba shen ka seng kan sa phah da ka dorkhas sha ka President bad kumjuh ruh sha u Myntri Rangbahduh jong ka ri India.
