Khliehriat, Jylliew 02:
U Myntri ka tnad Home (Passport), Legal Metrology bad kiwei, u Bah Kyrmen Shylla u la plie ïa ka jingsdang ka ‘Nasha Mukt Bharat Abhiyaan Campaign’ ha ka jingïalang kaba la long ha Community Hall, Lad Rymbai, Dongwah ha ka Sngi Thohdieng.
Ïa ka prokram la pynlong da ka District Administration bad District Social Welfare Officer, East Jaiñtia Hills District halor ka phang “Delete drugs or they will delete you from this World”, bad ïa ka jingïalang la pynïaid da ka Kong Rinibeth Patlong, Program Manager MCSWA, TI, CC, Khliehriat ha ka jingdonlang ki nongshong shnong, ki khynnah skul bad nonghikai.
Ka ‘Nasha Mukt Bharat Abhiyaan Campaign’ ka dei ka thong jong ka Sorkar Kmie lyngba ka tnad Social Justice & Empowerment ban ïakhun, pynduh jait bad pynduna ïa ka jingpyndonkam drok.
U Bah Shylla u la ong u drok ym tang ba u ktah ïalade shimet, hynrei u ktah ïa ka ïing ka sem, ka imlang sahlang bad u ktah wat ïa ka ïoh ka kot, ka koit ka khiah nalor kiwei-kiwei.
Kumta u la kyntu ïa ki khynnah skul bad baroh kiba ïadon ha ka jingïalang ban long ki nuksa ïa kiwei da kaba jied ïa ka lawei kaba bha ym ban shah pynbiej.
U Deputy Commissioner, East Jaiñtia Hills District, Khliehriat, u A. Baranwal, IAS, u la ong bun ki briew ki shim ïa ki jingdih pynbuaid ban lait na ki jingeh, ba ki kwah mad bad shah pynbor. Hynrei une u jingdih pynbuaid um lah ban weng ïa ki jingeh bad kyntu ïa ki khynnah skul bad samla ban kiar na kaba pyndonkam ïa kino-kino ki jait jingdih pynbuaid, u la ong.
Shuwa kane, ka Ananya Majumder, Senior State Coordinator ka tnad Social Justice & Empowerment ha ka jingkren lamkhmat ka la ong ïa ka ‘Nasha Mukt Bharat Abhiyaan’ la sdang ha u snem 2020 ha ki 272 tylli ki distrik ka ri.
Ha ka jingïalang u Myntri u la pynkup burom ïa u S. Lamare, uwei na ki samla ka distrik uba la lait na ka jingkyrni drok bad ïa ka kynhun ‘Anti Narcotic Task Force’ kaba trei shitom ban tehlakam ïa ka jingshalan ïa u drok hapoh ka distrik.
Ïa ka ANTF la sdang ha u snem 2019 bad naduh utei u snem ki mukotduma ba la ïoh pdiang ki long 63 tylli, kiba shah kem – 114 ngut, u ‘heroine’ ba la ïoh kurup u la kot 3.5 kilo, u Kynja – 2252 kilo, dawai kuli Yaba – 43.12 kilo bad 47,000 bitor ka ‘Phensedyl’.
Kiwei kiba la ai jingkren ki long u Bah B. Jyrwa, MPS, Addl. Superintendent of Police, East Jaiñtia Hills District, ka Kong R. Passah, District Social Welfare Officer, East Jaiñtia Hills District bad kiwei.
Hadien ka jingïalang u Myntri u la kaweh lama ïa ka ‘Bike Rally’ na Lad Rymbai ban pynsngewthuh halor ka jingma jong u drok.
