Paris, Jylliew:
Uwei na ki khlur ialehkai Tennis ka ri Germany uba lah bat teng ia ka kyrdan ba 2 ha ka pyrthei u Alexander Zverev u lah sdang mynta ia ka jingiaid lynti ka jong u ha ka lympung iakhun Grand Slam ka French Open da kaba wanphai biang sha ka lynti jingjop, ha kaba utei u rangialehkai u la lah ban tam noh shakhmat da ka jingjop pyrshah ia u nongialehkai na Slovakia u Alex Molcan da 6-4, 6-2, 6-1 na ka bynta ban jam pat sa sha ka kylla iakhun kaba lai ha ka lympung.
Shuh shuh ruh ka khubor ka iathuh ba utei u rangialehkai u lah iai pynneh pynsah ruh ia ka rekod ba seisoh ka jong u ha katei ka lympung ialehkai da katei ka jngjop hadien ka jingiohlad bha ban khur ia ki dor-thong pyrshah ia utei u nongialehkai na Slovakia ha ka jingia aireng kaba lah neh 1 kynta 58 min na ka bynta ban jam sha katei ka kylla iakhun ha ka sien kaba hynniew.
Kumta hadien katei ka jingjop, u Zverev un hap ban pynkhreh bha shuh shuh na ka bynta ban iakhun pat sa bad u nongialehkai na ka ri USA u Frances Tiafoe. Kumba ka paw mynta ka long ba u Zverev u bat mynta ia ki 25-7 rekod jingjop ha Roland Garros.
Ha kawei pat ka kylla iakhun kaba ar ha ka lympung, u Taylor Fritz na USA u la lah ban pynliem noh ia u Arthur Rinderknech na France da 2-6, 6-4, 6-3, 6-4 ha ka kyrdan iakhun paramarwei nak ab ynta ban pyniaryngkat ia ka resol kaba biang tam eh ka jong u ha katei ka lympung ialehkai.
Kumta ruh utei urangialehkai na USA uba lah ioh ban mih madan haduh hynniew sien ha katei ka lympung ialehkai un hap ban pynkhreh bha ialade sa na ka bynta ban iakynduh pat bad u Francisco Cerundolo; nongialehkai na Argentina uba la lah ban pynliem noh ia u nongialehkai na Germany u Yannick Hanfmann da 6-3, 6-3, 6-4.
