Nongstoiñ, Jylliew 02:
Hadien ba ki pulit ha ka 31 tarik Jymmang ki la kem noh ïa uwei u briew uba la shah kynnoh donkti ban leh be-i-jot ïa uwei u khynnah na kawei ka shnong ha West Khasi Hills, ka tyllong khubor na ki nongïalam katei ka shnong ki la ong ba nalor utei u khynnah la suba ba ki dang don bun sa kiwei pat ki khynnah kiba la ngat ha katei kajuh ka apot.
Ki la ïathuh ruh ba halor katei ka jingjia, ha ka step 3 tarik mynta u bnai, ka shnong kan sa pynlong ïa ka dorbar ka ban sdang ha ka por 8 baje mynstep.
Lah ban kdew ba ka jingkem jong ki pulit ïa utei u briew ka dei hadien ba ki pulit ki la ïoh pdiang ïa ka jingujor na kawei ka longkmie (kaba la buhrieh kyrteng) na kawei ka shnong hapoh West Khasi Hills halor ka jingshah leh be-i-jot u khun jong ka ha uwei u briew.
Utei u briew uba la shah kynnoh donkti ban leh ïa katei ka kam pohjait u dei uba la tip kyrteng kum u Mebanrilang Syiem Shangoi na kawei ka shnong kaba ha West Khasi Hills bad la ong ruh ba katei ka jingjia ka la jia naduh u snem 2022. Hynrei katei ka longkmie kaba la ujor ka dang tip myn ha ka 29 tarik Jymmang hadien ba u khun jong ka u la ïathuh ïa kaei kaba jia ïa u.
Kumban shu pynkynmaw hangne, hadien ba ki pulit ki la kem noh ïa utei u suba nongleh be-i-jot, la pynkit noh ïa u ban set along ha nongbah Shillong.
