Shillong, Jylliew 02:
Ka Deputy Commissioner ka East Khasi Hills District, ka Kong R.M Kurbah, ha ka Sngi Thohdieng, ka la ong ba ka rukom pynïaid kali pud sngi lane Odd-Even System na ka bynta ki kali kamai ka long tang ka jingpyrshang hapoh ka shi taïew ban khmih la ka ïarap ne kam ïarap ïa ka jingdheng kali.
Naduh ka 5 tarik u bnai Jylliew 2023, yn pynïaid noh da ka Odd/Even System na ka bynta ki kali kamai ba kynthup ïa ki bos saw (SPTS), ki maxi cab (SSTS) bad ki taksi kiba ïaid na Kashari sha Khyndailad bad sha Motphran, la ong ka Kong Kurbah ha ka hukum ba la pynmih ha ka 1 tarik Jylliew.
Hynrei, na ka liang ki ar kynhun kiba kynthup ïa ka Synjuk Ki Nongñiah Taxi Sor bad Khapsor bad kawei pat ka kynhun ïa kaba la tip kum ka East Khasi Hills Local Taxi Welfare Association ki la leit ban ïakynduh ïa ka DC ban pynpaw ïa ka jingpyrshah jong ki ïa katei ka hukum.
Haba kren sha ki katto katne ki lad pathai khubor ha ka Sngi Thohdieng, ka DC ka la ong ba hadien ka jingïakynduh bad kitei ki artylli ki kynhun ka la ïathuh ha ki ba katei ka hukum ka dei kaba la dep ban pynmih bad ym lah ban weng ïa ka hynrei hap ban pyrshang shwa ban peit la katei ka jingpyntreikam ka ïarap ne kam ïarap bad ka long kumno.
“Katkum ki kaiphod kiba ngi la ïoh bad katkum ki video kiba ngi la ïoh ban ring, ngi la wad bad peit thuh bha haei ka don ka jingdheng kali bad balei ka don ka jingdheng kali, hadien kata ba ngi la ïa peit na kaei ka daw, ka la mih kato ka hukum,” la ong ka DC.
Ka DC ka la ong ba katei ka jingpyntreikam ban pynïaid da ka Odd-Even System ka dei tang ka jingpyrshang ha kane ka shitaïew ban wan bad yn sa khmih bad peit la katei ka jingpyntreikam ka pynduna ne em ïa ka jingdheng kali bad lada ka pynduna yn sa pyntreikam pura, hynrei lada kam ïarap pat yn sa ïaleh ban wad da kiwei pat ki lad ki lynti kiba biang wat lada hap ban ktah ïa ki kali jong ki riewshimet ruh.
“Lada ngi weng bad ngi pynïaid ïa ki Odd-Even nombor ha kane ka taïew ban wan, kan ai jingïarap kumno ïa ka rukom pynïaid kali bad lada ngi lap ba kam ïarap, ngin hap ban peit sa da kiwei pat ki lad,” la ong ka DC.
Na ka liang ka DC ka la ong ruh ba katkum ka jingkhmih na ki video bad ki kaiphod ba la ïoh ka la ong ba ka jingdheng kali ka dei namar ba kam don ka jaka ïeng kali ban kit bad buh ïa ki paidbah kiba shong kali bad ki kali ruh ki la shu ïa ïaid pyllun pyllun na kajuh sha kajuh ka jaka.
“Ngi ruh ngim kwah ban leh lut baroh khoit ban pynbeit lut kumta. Ngi la shim ïa kane kum ka jingpyrshang bad ngin peit shwa la ka long ne em bad lada ngi ïohi ka jubab kaba bha, ngin sa pynbiang sa kiwei kiwei ki jingdonkam bad lada kam ïarap te ngi hap ban leh biang kumba ka long, ngi dang ïa don ka jingthmu hynrei ka bun bha kaei kaei kaba ngi thmu ban leh bad kane ka dei tang ka bynta kaba nyngkong,” la ong ka DC.
Shuh shuh ka DC ka la ong ruh ba katei ka jingpyntreikam ïa ka Odd-Even System kam dei kaba la pyntreikam ha baroh kawei ka sor Shillong, hynrei ka dei tang na Kashari ter ter shaduh sha Khyndailad bad sha Motphran namar ki dei kine ki jaka kiba jur bha ka jingdheng kali.
Ka DC ka la ong ba khlem da pyrshang kumno yn ïoh ïa ka jubab bad ka la ong ba ha kano kano ka rai ki ju don kiba myntoi bad ki bym myntoi bad kane ka jingpyntreikam ka khlem khang ïano ïano ba kin kamai sha kiwei ki thaiñ jong ka sor ba kin ïaid.
