Shillong, Jylliew 02:
U President ka East Khasi Hills Local Taxi Welfare Association, Bah Wandon-bok Jyrwa, u la ong ba ka Motphran bad ka Khyn-dailad ki dei u klongsnam ïa ki nongñiah local taxi ban pynhiar ne kyntiew ïa ki paidbah nongleit nongwan.
Haba ïakren bad ki lad pathai khubor hadien ba la dep ïakynduh ïa ka Deputy Commissioner ka East Khasi Hills ka Kong R. Kurbah, u Bah Wandon-bok u la ong ba ka seng ka pyrshah beit ïa kane ka jingpyntreikam da kaba phah ïaid odd bad even ban rung ha Motphran bad Khyndailad. Hynrei ka DC ka la jubab ba kan pyntreikam beit namar ka dei ba la pynmih hukum da ka ïingbishar Meghalaya High Court namar ka jingkhapngiah palat ha kine ar tylli ki ïew.
Ha kane ka sngi ka Synjuk Nongñiah Taxi sor bad khapsor hadien ba ki la dep shong jingïalang ha madan Malki ki la ïaid da ka kjat ban leit ïakynduh lang ha kajuh ka por bad ki nongkitkam ka East Khasi Hills Local Taxi Welfare Association ha kamra treikam ka DC.
Ha kajuh ka por u la ong ba ka seng ruh kan leit ujor lang sha ka ïingbishar halor kane ka hukum.
Nalor kata, u Bah Wandonbok u la ong ka jingkhang ban leit sha Motphran bad Khyndailad ka long kumba ktah ïa u klongsnam ban pynsangeh ïa ki thied snam ban ïaid. Namar kata, kim kwah ban ïa bun nia namar ki ruh kin hap ban pynsngew lang sha ka ïingbishar ban ai lang ka jingbishar kaba hok ïa ki nongñiah kali ruh.
“Ka jingdheng kali ha Khyndailad bad Motphran kam dei ka daw na ki local taxi, hynrei namar la bun ki kali shimet namar ka sor ruh ka don ïa ka jaka kaba 10 square kilometer” u la ong.
U la ong lada khang ïa ki local taxi dei ban khang ruh ïa u briew ban nym rung sha Motphran bad Khyndailad.
Shuh shuh u la ong ba lada ym shah ban rung sha Motphran kumno ki kali kiba kamai na Mawlai kin phai, bad kin ki paidbah kumno kin ïaid da kjat. Nangta haba ïadei bad kiba wan na Laitumkhrah kumno yn pynhiar noh tang ha IGP ban phah ïaid kjat shaduh Motphran bad Khyndailad kane kam lah ban long.
