Shillong, Jylliew 02:
Hadien ba ka Deputy Commissioner ka East Khasi Hills District, ka Kong R.M Kurbah, ha ka Sngi Palei, ka la pynmih hukum ba ki kali kamai ba kynthup ïa ki bos saw (SPTS), ki Maxi Cab (SSTS) bad ki taksi kin hap ban ïaid pud sngi lane ‘Odd-Even’ na Kashari sha Khyndailad bad sha Motphran naduh ka 5 tarik Jylliew, 2023, na ka daw ka dheng kali ka dei namar ka jingbym don ki jaka ba biang ban ïeng ki kali kamai ban kit bad pynhiar briew. Kumta na ka liang U Nongsaiñ Hima u la pyrshang ban lum jingtip halor ka jingdon ki kali kamai ha kane ka sor.
Katkum ki jingkheiñ jingdiah ba la lum na ka shlem treikam u District Transport Officer (DTO), East Khasi Hills, Shillong, la shem ba ki don 5,136 tylli ki taksi kiba la pynrung kyrteng ha ka thaiñ Shillong Region.
Nalor ki taksi, ki don sa 35 tylli ki Shillong City Bus, 194 tylli ki Auto Rickshaw, 17 tylli ki bos ba pyndonkam da ki shlem ai jingpule ha Shillong Region. Ki don ruh sa 86 tylli ki bos kiba kamai na Shillong ban kit briew sha kiwei pat ki jaka kum ka Shella, Lyngkhoi, bad kiwei-kiwei.
Hynrei ïa ki jingtip kiba ïadei bad ki bos STPS bad Maxi Cab SSTS ym pat lah ban ïoh haduh ba thoh ïa kane ka khubor.
Katkum ka hukum ba la pynmih da ka Kong Kurbah, ki kali kamai (Bos STPS, Maxi Cab SSTS bad taksi) kiba kut ha u nombor 1,3,5,7,9 kin ïaid na katei ka lynti; kata, na Kashari Point sha Khyndailad bad Motphran ha ka Lah Sngi U Blei, Sngi Balang bad Sngi Thohdieng. Ki kali kiba kut ha ki nombor 0,2,4,6,8 kin ïaid na katei ka lynti ha ka Sngi Ba-Ar, Sngi Palei bad Sngi Saitjaiñ. Hynrei kane ka ‘Odd-Even System’ kan ym treikam ha ki Sngi U Blei.
Nalorkata, ka Deputy Commissioner ka la hukum ba baroh ki kali ki dei ban long kiba la pyndait da ka Registration Plate kaba long katkum ka Registration Certificate (RC), bad ïa ka RC jong ka kali dei ban pyni ha man la ki por ba ki bor ka aiñ ki pan.
Lada lap ïa kino kino kiba pyndonkam da ki nombor plate ba la pynkylla, ka Deputy Commissioner ka la maham ban pynshitom katkum ki aiñ kaba kynthup ïa ka jingpynduh noh ïa ka laisen jong u nongñiah kali.
Ka Kong Kurbah ka la ong ba ka jingkhapngiah jong ki kali ha Shillong ka kham jur ha ki jaka ïew ba kynthup ïa ka Khyndailad bad Motphran. Ha kajuh ka por, ka la ong ba ka jingdon ki kali kamai kiba ap ha ki lad Khyndailad bad Motphran ka wanrah ïa ka jingkhapngiah bad kane ka buh jingeh ïa ki nongpynïaid kali bad kumjuh ruh ïa ka jingshngaiñ jong ki nongïaid lynti.
Ka la ong ruh ba ka jingpynmih ïa katei ka hukum ka long hadien ba ka Meghalaya High Court ha u Nohprah 2021 bad ha ka 11 tarik Jymmang, 2023 ka la ai hukum ba dei ban shim ïa ki sienjam ban pynkylluid ïa ka jingkhapngiah ki kali ha Shillong khamtam ha ki jaka ïew bad ha ki jaka rung jaka mih. Hynrei kane ka hukum na ka Kong Kurbah ka la pynbitar ïa kiba bun ki nongñiah kali kamai khamtam kiba ñiah taksi bad kiba ju hap ïaid na katei ka lynti man ka sngi. Ki la pynpaw ba ïa katei ka hukum la pynmih khlem da ïakren ne ïathir shwa bad ki kynhun jong ki nongñiah kali.
