Colorado, Jylliew:
U President ka United States, u Joe Biden ha ka Sngi Palei u la kyllon hapdeng ka jingleit jong u sha ka sngi ba kyrpang jong ka tnat liengsuiñ ka United States kaba la pynlong hapoh Colorado. Hynrei tang mar ia khie naba kyllon, u Biden u la pynpaw ba um shym la mynsaw ne shitom eiei na katei ka jingjia ha katei ka sngi bad tang hadien khyndiat por ruh u la kren biria noh shaphang katei ka jingkyllon jong u.
U Biden, u la don 80 snem ka rta bad ha katei ka sngi u la ai jingkren sha katei ka tnat shipai bad u la ioh ruh ban khublei kti bad ki pulit kiba dang don hapoh ka jingpyntbit bad hadien kata u la iaid biang noh sha ka jaka shong jong u kaba u la kyllon hangta.
Dei ki dkhot jong ka tnat shipai liengsuiñ kiba la iarap ban pynieng ia u ha ka por ba u kyllon ha katei ka sngi. Hynrei u Biden u la pynpaw ba um shym donkam jingiarap eiei shuh nadien ka jingiarap pynieng jongki na katei ka jaka ba u kyllon.
Hynrei hadien ba u la khie nangta, u Biden u la kdew ia kawei ka byrni shyiap kaba don hajrong stage bad kaba u kum ioh lymbup bad dei na katei ka daw ruh kaba pynlong ia u ban ur bad kyllon.
Ki heh kiba iadon lang ha katei ka sngi ki la pynpaw ka jingsngew synei haba ki iohi ia u President ba un leit ur bad kyllon kumtei ha katei ka sngi namar katkum ha ki rta jong u, ka long ruh kaba ma ban ur bad mad ia kum kitei ki jingjia watla ki long kiba rit bad ki bym da ktah. Naba ki ong ruh ba ka jingshaniah jong ki, ka long tang ha u hi ba un dang bat biang ia ka shuki President tad haduh u Kyllalyngkot jong u snem 2029.
