Shillong, Jylliew 02:
Ka Laban Sports Club ka la sdang ïa ka lympung ïalehkai ba la tip kum ka 2nd Meghalaya Open Table Tennis Cash Prize Tournament 2023 ha ka sngi Thohdieng ha Indoor Stadium jong kane ka klob.
Ka jingpynlong ïa kane ka lympung ka long ban plie lad ïa ki nongïalehkai table tennis ba kin pynpaw ïa la ki sap ïalehkai ba kyrpang ha la ki jong ki kyrdan ïalehkai jong ki shynrang bad kynthei.
Ka Deputy Commissioner, East Khasi Hills, Kong Rosetta M. Kurbah (IAS) kaba long kum ka kongsan, ka la pynshlur bad ai mynsiem ïa ki khynnah ïalehkai. Nalor kata, ka la kyntu ïa ki khynnah ba kin pynleit jingmut ha ka kam ïalehkai khnang ba kin kynjoh sha ka thong.
“Ngi dei ban kut jingmut ban pynurlong ïa ki jingangnud jong ngi bad ym dei ban duh mynsiem ha ka kam ïalehkai. Hynrei ka jingtrei shitom kan ïarap ban pynurlong na ka bynta ban kynjoh sha ka thong. Phi dei ban don ïa ka jingkut jingmut ha ka ban bate ïa ka por ïalehkai bad ka jingpule,” la bynrap la Kong Kurbah.
U President ka Laban Sports Club u Sammy Myrthong u la pynpaw shaphang kane ka klob halor ka shlem ai jinghikai bad u la khmih lynti ruh ba ka Table Tennis Academy kan long kaba paw ha ka thaiñ shatei lam mihngi.
“Ngi la dep phah ïa ka jingtyrwa sha ka Sorkar Jylla na ka bynta ban pynkylla dur ïa ka Laban Sports Club kum ka Table Tennis Academy kaba kynsai ha ka thaiñ shatei lam mihngi. Ka thong ka jong ngi ka long ban kyntiew ïa ki khynnah ïalehkai bad ba kin paw ha ki lympung ïalehkai hapoh ka ri. Lyngba kane ka lympung, ngi kwah ban kyntiew bad ban sei ïa ki sap ïalehkai kiba na kane ka Jylla,” u la bynrap.
Ha kawei pat ka liang u Vice-President ka Laban Sports Club u Bah David Laitphlang u la pynpaw halor ka jingïaid lynti kane ka klob. “Ka Laban Sports Club ka la long kaba paw naduh ba la seng ïa ka. Ngi la lah ban pynpaw ïa ka jingtbit ha ka football, hockey, cricket bad mynta ha ka Table Tennis. Ngi khmih lynti ban kin mih ki nongïalehkai kiba kynsai ha ka lawei ka ban wan.”
Kumjuh u Rangbah Shnong ka Laban u Bah Edward Kharwanlang u la pynshlur bad ai mynsiem ïa ki khynnah ba kin ïalehkai bha khnang ban kin nangkiew shaphrang ha ka kam ïalehkai.
Ha kane ka lympung ki don 72 ngut ki nongïashim bynta ha la ki jong ki kyrdan. Kine ki kynthup ïa ka Under-15 Boys’ Singles, Men’s Doubles, Under-19 Boys’ Singles, Veteran Singles (40 years and above), Veteran Doubles (40 years and above), Men’s Singles, bad ka Women’s Singles.
