Shillong, Jylliew 02:
Ka sorkar jylla ha ka Sngi Thohdieng ka la sdang ban pynïaid ïa ka bos banyngkong eh ban kit ïa ki khynnah skul ba la pynïaid da ka Sustainable Transport and Efficient Mobility Society (STEMS) kum shi bynta ban pynduna ïa ka dheng kali, ban wanrah ïa ka jingshngaiñ ha ka ïaid ka ïeng bad ban pynbha ïa ki lad ban kit ïa ki nongshong shnong ha jylla.
Ha u kyrwoh khubor, ka Kong Isawanda Laloo, IAS, kaba dei ka Chief Executive Officer ka Sustainable Transport and Efficient Mobility Society (STEMS), Shillong, ka la pyntip ba ka bos banyngkong napdeng ki 30 tylli ka la sdang ban treikam mynta ka sngi na madan phutbol Umpling sha Pine Mount School.
Ki la don 12 tylli ki jaka ban kyntiew bad pynhiar ïa ki khynnah ha katei ka lynti ba kynthup ïa ka madan phutbol ha Umpling, Nongrah Presbyterian Church, Nongrah Mawshyieng, Nongrah, lad Lapalang, Lumbatngen (Law U Sib), jaka sangeh bos ha Demthring, Nongkhyriem, Nongthymmai, Jylli Shop, Fire Brigade, bad ka skul Pine Mount.
Ka Kong Laloo ka la ong ba ka STEMS ka thmu ban sdang ïa kaba kum kane kajuh sa na kiwei pat ki jaka bad ki skul.
Ka la ïathuh ba ki kmie ki kpa ki lah ban peit lyngba ki kor ki bor ïa ki bos kiba ïaid bad ban buh jaka lypa na ka bynta ki khun ki kti jong ki da kaba pyndonkam da ka Mobile App. Na ka daw ba ka jingshngaiñ ka long ka bakongsan, ka Kong Laloo ka la ong ba ïa kine ki bos la pyndait da ki kor GPS khnang ban tip shaei ki ïaid bad shano ki poi bad hapoh jong ki bos, la buh ruh san tylli ki kor ring dur lane ‘Camera’. Kiba peit ïa kine ki bos ruh ki dei ki briew kiba la ïoh bha ïa ka jinghikai.
Haduh mynta, ka Kong Laloo ka la ong ba ka STEMS ka la ïoh pdiang ïa 455 tylli ki jingpynrung kyrteng bad palat 250 tam ki kmie ki kpa ki la phah ïa ki jingkylli ban tip kham bniah shaphang ka rukom pynïaid ïa kine ki bos skul.
Ka la ong ba ka sorkar ka ai mynsiem ïa ki nongshong shnong ban pyndonkam ïa kitei ki bos bad la kyntu ïa ki kmie ki kpa ba kin pynrung kyrteng.
Ha kajuh ka por, ïa kitei ki bos yn pyndonkam ruh na ka bynta ki nongleit trei leit ktah ha ki shlem treikam bapher bapher bad kiwei ruh kumjuh. Tangba kane kan long kham hadien khnang ban pynduna ïa ka jingshaniah ha ki kali shimet.
Ïa ki jingtip ba bniah halor kitei ki bos, lah ban ïoh da kaba leit na https://stems-meghalaya.nic.in/ lane ban phone ha 0364-3500097/ 0364-3500098 ha ki kynta long trei lane ban email sha [email protected].
