Oman, Jylliew:
Ka jingiakhun phainal jong ka kynhun ialehkai Hockey ka India ha ka lympung ialehkai kaba mynta ha Salalah ka Men’s Junior Asia Cup ka lah long kaba seisoh bad ba jop, hadien ba katei ka kynhun ialehkai ka la lah ban khur noh shalade ia ka trophy jingjop na katei lympung hadien ba lah pynliem noh ia ka Pakistan da 2-1 kol.
Kumta ha kaba iadei bad katei ka bynta jong ka jingkhur jingjop ka kynhun, ka khubor ka iathuh ruh ba ki kol kiba kloi ba ka kynhun ka lah ioh ban khur ki long lyngba u Angad Bir Singh (13min) bad na u Araijeet Singh Hundal (20 min) kum ka jingpynthikna shuh shuh ba ka kynhun ka iaisah ha ka jingpyniaid ka jong ka ha ka jingiakhun baroh kawei ha ryngkat bad ka jinglah ban tem ia ki bol da u rangakol jong ka u Shashikumar Mohith Honnenahalli ba lah pynlong ia ka kynhun ban iai tam kol shuh shuh shakhmat ha ka jigialehkai baroh kawei.
Shuh shuh ruh, da katei ka jingjop, katei ka kynhun ialehkai ka lah thaw ia ka rekod ba thymmai halor ka jingkhur bun tylli ki jingjop bad ki khusnam ha katei ka lympung ialehkai, ha kaba katei ka kynhun ka lah dep ban khur teng ia ka trophy na ka lympung ha u snem 2004, 2008 bad 2015; katba ka Pakistan kaba long ka kynhun iakhun pyrshah jong ka India, ka lah rah ia ka nam lahduh na katei ka lympung ialehkai ha u snem 1988, 1992, 1996.
Da kaba ithuh ia ka jinglah jong ka kynhun ialehkai ha ka jingialehkai bha ka jong ka bad ka jingiaid lynti ba khlem shah pynrem ha ryngkat bad ka jingkhur rekod halor katei ka bynta ha kum katei ka lympung ialehkai, la sakhi mynta ia ka jingshah jied ka kynhun sha ka FIH Men’s Junior World Cup ha Malaysia bad na ka liang jong ka tnad treikam bahakhmat jong ka Hockey India (HI) ka pynbna mynta ia ka song pisa kaba haduh T.2.00 lak kum ka khusnam sha man la ki nongalehkai ka kynhun bad ruh ka song pisa kaba T.1.00 lak sha man la ki nongpyniaid, nongiarap jong ka kynhun.
Haba phai biang sha ki jingiakhun ba lah dep bad ka jingiaid lynti ka kynhun sha ka jingiakhun phainal, ka khubor ka pynpaw biang hangne ba katei ka kynhun ka la lah ban pynliem kput ia ka South Korea da 9-1 kol ha ka jingiakhun semifinal ka jng ki.
Kumta ka lah khynniat ruh ia katei ka kynhun Pakistan kham shadien ha katei ka jngiakhun phainal ka jong ki na ka bynta ban kamai kol ha ki por ialehkai kiba shakhmat. Hynrei na ka liang jong ka Pakistan ka lah iakhun da kaba tyngeh na ka bynta ban khyllie ia ki kol shah thep bad u Araijeet u lah ioh ban ai mynsiem sha ka kynhun ha ka 20min ialehkai da ka kol ba nyngkong bad haduh kaba kut jong ka jingiakhun katei ka kynhun kam shym la lah shuh ban pynphai kol biang tad haduh ba kan da mad noh ia ka jingshah pynrem hadien ba ka lah dep ban khur ia ka shi kol ha ka jingiakhun.
