Shillong, Jylliew 02:
Ka Synjuk Nongñiah Taxi Sor bad Khapsor ka la khot kyrkieh ïa ka jingïakynduhlang hapdeng ki para nongñiah bad trai taksi kaba la long mynta ka sngi ka 2 tarik Jylliew 2023 ha madan Malki ban ïakren halor ka jingpynmih hukum ka shlem treikam Deputy Commi-ssioner, East Khasi Hills District ban pynïaid odd bad even ïa ki local taxi ban rung sha Khyndailad bad Motphran.
Kane ka hukum ba la pynmih da ka shlem treikam DC ka long ban treikam noh naduh ka 5 tarik Jylliew ban pynkylluid ïa ka Khyndailad bad Motphran namar ka la khapngiah palat.
Hadien ka jingïalang kaba la neh kumba shi kynta shiteng eiei, ki nongñiah local taxi ki la ïaid da ka kjat na madan Malki lyngba ka Secretariat ban leit shaduh shlem treikam ka DC, Shillong.
Haba ïakren bad u Bah Pynsuk Youroi, General Secretary, Synjuk ki Nongñiah Taxi Sor bad Khapsor, u la ïathuh ba hadien ba la ïakren bad ka DC ki la pynpaw ka jingpyrshah beit ïa kane ka rai kaba la pynmih, hynrei ka DC kam lah shuh ban weng namar ka la mih hukum na ka ïingbishar.
U la ïathuh ba ka DC kan pyrshang shwa tang shi taïew khnang ban sngewthuh ka ktah shisha na ka jingdon ki local taxi ne ki hap ban khang sa ïa kiwei pat ki kali lada dang donkam.
U la pyntip ruh ba ha kane ka shi taïew kan sa peit ka don ne em ka jingktah ïa ki nongñiah taksi.
Kumta na ka liang ka seng, u la pyntip ba kan sa shong ïa ka CEC ban ïa pyrkhat bha khnang ba kane ka jingkhang ïa ki katto katne ki kali ha ka shi sngi ban rung sha Motphran bad Khyndailad kan nym ktah ïa ki.
Shuh shuh u la pyntip ba kine ki ar tylli ki ïew kaba ki paidbah ki ju leit donkam man ka sngi namar lada ym lah ban leit sha Motphran bad Khyndailad kan buh ïa ki ha ka jingeh namar kim ïoh shuh ban kamai.
