Khliehriat, Jylliew 02:
U Myntri ka tnad Excise, u Bah Kyrmen Shylla ha ka Sngi Thohdieng u la pyllait ïa ka ‘App’ kaba nyngkong eh hapoh ka Jylla ban buddien ïa ka jingwan skul jong ki nonghikai ïa kaba tip kum ka ‘Teacher Attendance Monitoring System’. Ïa kane ka ‘App’, la pyllait da u Myntri ha ka jingïalang lyngkot kaba la long ha kamra ‘Video Conference’ jong ka shlem treikam u Deputy Commissioner, Khliehriat ha ka jingdonlang u Deputy Commissioner ka East Jaiñtia Hills District, u Abhilash Baranwal, IAS, ki ophisar Sorkar bad kiwei-kiwei.
U Bah Kyrmen haba ai jingkren u la kyntu ïa ki nonghikai ban ïatreilang ryngkat bad ka bor pynïaid distrik lyngba ka ‘Teacher Attendance Monitoring App’.
Kumta u khmih lynti ba lyngba kane ka ‘App’, kan pynmyntoi shibun ïa ki khynnah ban lait duh ïa ki jinghikai da kaba ki nonghikai ki pep skul khlem ïoh jingbit.
Hashuwa, u A. Singh, IAS, SDO (Sadar), East Jaiñtia Hills District u la pyni lyngba ka ‘Video Conferencing’ ïa ka rukom treikam kane ka ‘App’ kaba yn khmih ïa ka jingwan skul jong ki nonghikai bapher-bapher ka distrik kiba siew tulop da ka Sorkar Jylla.
U la ïathuh ba ïa kane ka ‘App’ la pynbit pynbiang da ka UBI Tech Solution bad ka treikam da kaba shna ïa ka ‘Geo-Fencing’ kaba long kum u pud sawdong jong ka skul lane ka jaka ba la jied bad kane ka ‘App’ kan sa pyntip lada don kiba rung ba mih ha kine jaka.
U la ïathuh ba kane ka ‘App’ ka dei kaba pyndonkam ruh da ka ‘Facial Recognition System’ ban ithuh ïa ka dur jong ki briew haduh 70% haba ki wan sha skul wat lada ym don ‘internet’ kan shim ïa ki kyrteng jong ki nonghikai bad lyngba kane ka ‘App’ yn tip ruh kino ki nonghikai kiba khlem wan sha skul.
Nalor kata, lyngba kane ka ‘App’, yn ïoh ruh ïa ka kaiphod bad ka rukom wan jong ki nonghikai sha ki skul ha baroh kawei ka distrik.
Shuh shuh u DC u la ïathuh ba shuwa ban leh ïa kane, la ai por 15 sngi ïa ki nonghikai ka distrik ban pynrung kyrteng hapoh kane ka ‘App’ bad la khmih lynti haduh ka 1 tarik u Naitung baroh ki nonghikai kin don kyrteng hapoh kane ka ‘App’.
