Washington, Jylliew:
Ka United States ha ka Sngi Balang, ka la pynbna biang ia ka song jingiarap da ki tiar iakhun ba la poi kumba $300 Million ia kiba yn phah sha Ukraine khnang ba ka tnat shipai Ukraine kan lah ban iakhun pyrshah ia ka Russia katba ka thma ka nang jur bad nang rhem ha kane ka por.
Ka tnat iada jong ka US ka la iathuh ba da katei ka song jingiarap kaba thymmai ha kane ka kynti, baroh ki song jingiarap ba ka US ka la phah sha Ukraine naduh ba sdang ka thma ha u Rymphang jong u snem 2022, ka la kot ia ka $37.6 Billion baroh.
Kumta la ong ba ka United States kan nang bteng ia ka jingiatrei lang bad ka jingai jingkyrshan ia ki para marjan ri naka bynta ban ioh phah ia ki lad jingiarap sha ka Ukraine khnang ba ka Ukraine kan long kaba bit bad kot bor ban iakhun pyrshah ia ka Russia.Shuh shuh ruh la ong ba ka United States ka la lam khmat ia kiwei ruh ki ri ba kin phah ia ki jingiarap sha ka Ukraine da kaba phah ia ki tiar siat bad tiar iakhun kum shi bynta ban ai jingkyrshan ia ka Ukraine hapdeng ka jingiakhun thma jongka pyrshah ia ka Russia. Katei ka jingiarap na ka US ha kane ka kynti, ka long ruh ha kum kane ka por katba ka Ukraine ka dang pynkhreh ban iakhun shitom ban iada ia la u jong u pud- u sam na ki kti jong ka Russia khamtam ha ki bynta East bad South jong ka Ukraine, kiba ka Russia ka pynjur ia ka jingthombor.
Katei ka song ba $300 Million na ka US, ka kynthup ruh ia ki kuli na ka bynta ki Patriot Air Defence System, ki ‘namding AIM-7, ki Avenger Air Defence System bad ki ‘namding Stinger.
