New Delhi, Jylliew:
U khlur ialehkai phutbol jong ka Portugal u Cristiano Ronaldo, u lah weng noh ia kata ka khubor hamsaia ha kaba iadei bad ka jingbym thikna ka lawei jong u kaba lah sdang ban tawiar ha u hadien ba ka klob kaba u ialehkai mynta na Saudi Arabia ka Al Nassr kam shym la lah ban khur ia ka trophy jingjop na ka aiom ialehkai kaba mynta. Utei u rangialehkai u la sdang ia ka jingiaid lynti ba thymmai ha katei ka klob ialehkai hadien ba mihnoh na ka Man United ha u bnai K’lyngkot. Kane ka wan ruh hadien ba ka jing-iateh kontrak ka jong u lah pyndam noh da ka jingiasngewthuh jingmutlang hapdeng ki arliang mamla ha u bnai Naiwieng 2022.
Kumta ha ka aiom ialehkai kaba nyngkong ka jong u na katei ka klob ba thymmai, u Ronaldo u la lah ban kamai ia ki 14 kol ha ki 16 tylli ki jingialehkai. Kumta da ka jingleit jong u ban pyniasoh bad katei ka klob, katei ka kynhun ialehkai ka lah don ia ka jingkyrmen ba shisha na ka bynta ban khur ia ka nam lahduh na ka lympung hadien ba kam shym la lah shuh ban poi sha ka thong ha ki lai aiom ialehkai ba lah dep. Shuh shuh ruh ki khana shane shatai ki lah sdang ban par kylleng ha kaba iadei bad ka kam ialehkai ka jong u ha katei ka kynhun bad ruh ha kaba utei u rangialehkai u don hapdeng ka jingialeh na ka bynta ban wanphai biang sha ka lympung EPL lem bad ka klob Newcastle United.
Kumta ha ka jingai jingkren ka jong u, u lah pynpaw ba u dap da ka jingkmen kaba khraw halor ka jingdon jong u ha ka klob bad u ban iai bteng ia ka kam shakri ka jong u kum u rangialehkai ba pawkhmat ka kynhun bad ha ka jingjied ka jong u ka long ba lada ka klob ka dang iai bteng ia ka jingiatreilang bad u, khlem pep ka jingiaisah ka jong u ha katei ka kynhun ialehkai kan sa long sa na ka bynta ki san snem ki ban wan.
Kumjuh ruh ka Saudi Premier League (SPL) ka long kawei na ki lympung iakhun kaba pawkhmat ha ka thain baroh kawei jong ka ri naba ka don ruh ia ki kynhun ialehkai kiba tbit bad ba khlain ha ryngkat jong ka jingdon jong ki rangialehkai ba tbit na Arab, hynrei ki donkam pat shuh shuh ia ka jingthaw thymmai ha ki ha kaba iadei bad ka kam ialehkai.
Kum kiwei pat ki khlur ialehkai phutbol katkum ka pateng-pakit kaba mynta, u Lionel Messi bad Karim Benzema ki paw mynta kum ki nongialehkai kiba lah don ka jingiajan kaba jur bad ki katto katne ki klob jong katei ka lympung ialehkai bad u Ronaldo u don ia ka jingngeit kaba skhem ruh ba kata ka jingialeh jong ki klob na ka bynta ban thied ia kum kitei ki khlur ialehkai kan nang iai pynjanai shuh shuh ia ka lympung ialehkai baroh kawei.
Kumba ka paw mynta u Ronaldo u iai long haduh mynta u nongjop ha baroh shi lynter jong ka kam ialehkai ha ka jingim ka jong u ha kaba u ioh ban pyniaid bad ban synshar ha man la ki lympung ialehkai kiba u ioh ban shimbynta.
Wat la u pyniasoh bad katei ka klob ha mar shiteng jong ka jingiaid lynti jong ka ha ka lympung, ka jingkhmiyh lynti ka kynhun ban rah ia ka thong jingjop na ka lympung baroh kawei ka dang iai don ha ka bad kaba rieh-tngen hadien jong utei u khlur ialehkai ba paw ha ka pyrthei da ka jingkyrmen ba kan sa ioh ban rah ia ka nam lahduh ha ki aiom ialehkai ban dang wan katba u Ronaldo un dang iaisah bad ka kynhun.
