Shillong, Jylliew 02:
Ka West Jaiñtia Hills District ka la rah ïa ka nam lahduh ha ka Chief Minister’s State Level Inter School Athletic Meet 2023 ba la pynïaid da ka tnat ïalehkai ka Sorkar Jylla ha ka sngi Thohdieng ha Sports Authority of India (SAI) Training Centre, Shillong.
Ha kane ka lympung ïalehkai kaba la neh lai sngi lynter, ka West Jaiñtia Hills ka la khur haduh 23 tylli ki takma kiba kynthup ïa 14 tylli ki takma ksiar, 6 tylli ki takma rupa bad 3 tylli ki takma rnong.
Kane ka district ka la rah ruh ïa ka nam kum ka nongjop ha ka liang ki shynrang da kaba ïoh khur 15 tylli ki takma kiba kynthup ïa 9 tylli ki takma ksiar, 5 tylli ki takma rupa bad kawei ka takma rnong. Katba ka West Khasi Hills ka la khur ruh ïa ka nam nongjop ha ka liang ki kynthei da kaba ïoh khur 16 tylli ki takma (7 tylli ki takma ksiar, 2 ki takma rupa bad 7 ki takma rnong).
Ka West Jaiñtia Hills ka la wan ha ka kyrdan ba-ar ha ka liang ki kynthei da kaba ïoh khur 8 tylli ki takma (5 tylli ki takma ksiar, 1 ka takma rupa bad 2 ki takma rnong). Katba ka lahduh jong u 2019, ka Ri Bhoi District ka la wan ba-ar da kaba khur 16 tylli ki takma (8 tylli ki takma ksiar, 2 ki takma rupa bad 6 ki takma rnong).
Haba phai sha ka East Khasi Hills ka la hiar sha ka kyrdan ba hynñiew da kaba ïoh khur tang 15 tylli ki takma (5 ki takma ksiar, 4 ki takma rupa bad 6 ki takma rnong).
Ïa ka nam Best Athlete ha ka kyrdan ïalehkai U-14 ka khur da ka Rukini RT Dkhar (East Jaiñtia Hills) ha kaba ka la kamai 716 point ha ka 600m bad u Brayenly A. Sangma (South Garo Hills) uba la kamai 649 point ha ka Jevelin Throw. Katba ha ka U-16 la khur da ka Sibila Maring (Ri Bhoi) kaba la kamai 668 point ha ka High Jump bad u Dangïaidlyngti Tmung (Ri Bhoi) uba la kamai 736 point ha ka 100m. Haba phai sha ka U-18 la khur da ka Himonki Khaii (West Jaiñtia Hills) kaba la kamai 667 ha ka 100m bad u Semeon Marak (North Garo Hills) uba la kamai 792 point ha ka High Jump.
Ïa ki khusnam la sam sha ki nongjop da ka Secretary ka tnat Revenue & Disaster Management bad kaba bat ruh kum ka vice-president jong ka Meghalaya State Olympic Association ka Kong Matsiewdor War Nongbri kum ka kongsan, kumjuh u Working President Bah John F. Kharshiing, u Assistant Director ka tnat ïalehkai Bah Paia War Nongbri, ki District Sports Officer bad kiwei.
Ha kane ka lympung ïalehkai kaba lai sngi la sakhi ïa ka jingwan ïashim bynta da 818 ngut ki khynnah na ki 12 tylli ki district jong ka Jylla.
