Shillong, Jylliew:
Ka State Cancer Society jong ka jylla Meghalaya lem bad ka Oncology Department, Civil Hospital Shillong Ki la pynlong da ka prokram ban rakhe ïa ka “National Cancer Survivors Day” ha ka 1 tarik mynta u bnai ha DAE-Civil Hospital Cancer Wing, Civil Hospital Shillong.
Ha katei ka prokram, na ka liang ki nongwan ïashim bynta kiba la koit na ka jingpang bampong ki la ïasam ïa ki khana kiba ïadei bad ka jingïaid lynti ka jong ki ha ka por ba ki dang don ïa ka jingpang. Na ka liang ka jong ki, ki la kyntu ïa kiwei ki nongpang kiba dang don hapdeng ki jingshah sumar ba ki dei ban don ïa ka jingskhem ha ka jingkyrmen bad kumjuh ruh ban shaniah ïa ki lad jingsumar khnang ba kin ïoh ïa ka jingkoit.
U Sampath Kumar, Principal Secretary, tnat Koit Khiah; Dr A. Mawlong, Head Radiation Oncology, Civil Hospital Shillong bad kiwei kiwei ki ‘riewpawkhmat ki la wan ban ïashim bynta ha katei ka prokram.
Kum ban shu ïathuh hangne, ïa ka ‘Cancer Survivor Day’ la ju rakhe kum shi bynta ban wanrah ïa ka jingpynsngewthuh paidbah halor ka jingpang bam pong bad kumjuh ruh ban rakhe bad ai mynsiem ïa kito kiba la ïoh ïa ka jingkoit bad kumjuh ruh na ka bynta kito ki nongpang kiba dang don hapdeng ki jingsumar.
