Shillong, Jylliew 02:
Ka Mawlai bad ka Khliehmawlieh ki la lah ban pyntikna ban jam sha ka semi final ha ka Meghalaya State League 2023 hadien ba ki la khur ïa ka jingjop ha ka sngi Thohdieng.
Ha kane ka sngi ka Khliehmawlieh ka la lah ban pynliem noh ïa ka kynhun kaba don shatrai ha ka Group-D, ka Warima Youth Club da 3-1 kol ha madan Chandmari kaba ha Tura. Katba ha ka jingïalehkai kaba la long ha ka nongbah Shillong, ka Mawlai ka la lah ban pynjem khnap haduh 12-0 kol ïa ka Seng Samla Laitryngew bad u Donlad Diengdoh u la ïoh ban thep haduh san kol.
Ha ka jingïakhun jong ka Group-B kaba la long ha Jowai, ka Niaw Wasa United ka la ïasam mar shi point ha ka jingïakhun pyrshah ïa ka Sein Pynbhalang hadien ba ïakhaid mar 3-3 kol. Katba ka Pyndengrei ka la khur ïa ka jingjop kaba nyngkong eh ha kane ka lympung hadien ba pynliem ïa ka Riangdo da 2-1 kol.
Wat la ka la jop ha baroh saw sien ïakhun, ka Mawlai kam shym la kheiñ sting ha kane ka jingïakhun kaba khatduh na ka bynta ban lamkhmat ha ka Group-A. U Diengdoh u la thep haduh san kol ha ka minit kaba 15, 28, 49, 58 & 77 hadien ki jingïarap pynbuh bol da u Robert Khongriah bad u Remark Kharmalki.
Ka Mawlai ka la pynbud biang ha ka ban thep kol ha kaba u Dajiedlang Wanshnong (18′, 31′, 39) u la khur ïa ka hat-trick ha ka kylla step, katba u Khongriah (11′, 62′) bad u Kenstar Kharshong (13′, 79′) ki la ïoh ban thep mar ar kol.
Kumba ka long mynta dei tang ka Mawlai kaba la khur jingjop ha baroh ki jingïakhun jong kane ka group, hynrei kaba dangsah mynta ka dei ka lahduh jong ka MSL 2019, ka Shillong Lajong (kaba dangsah sa ar sien ïakhun) ha kaba ka don jingkyrmen ban bteng ïa ka jingjop.
Ha ka jingïalehkai kaba ha, ka Warima ka la thep ïa ka kol kaba nyngkong eh ha ka minit kaba 11 lyngba u Akim R. Sangma (11′), hynrei hadien shiteng kynta ka Khliehmawlieh ka la lah ban pynphai kylla lyngba u Shelbikstar Kharshilot ha ka minit kaba 34. Une u rangïalehkai shakhmat u la pynbud biang ïa ka kol kaba ar ha ka minit kaba 52 jong ka kylla miet bad ïa kawei pat la thep da u Lenny Kravity Lyngdoh (73′) na ka bynta ban khur syndon ïa ka jingjop.
Ha ka jingïalehkai ha Mawkyrwat, ka Pyndengrei ka la khur ïa ka jingjop kaba nyngkong ha ka MSL 2023 hadien ka la shah rem ha ki saw sien ïakhun. U Silverstar Thongni u la ïoh ban thep kol nyngkong na ka bynta ka Riangdo ha ka minit kaba 22, hynrei u Alandonal Sohlangpiaw u la lah ban pynphai kylla ar kol ha ka minit kaba 54 & 62.
Haba phai sha ka jingïakhun ha Jowai, ka Sein Pynbhalang ka la wanphai da ka jingkhlaiñ bor na ka bynta ban pynïakhaid hadien ba ka la mad ïa ka jingshah rem hadien sien kynthih. U Paiabanteiskhem Bhoi (14′) u la ïoh ban pynkhih jar nyngkong eh, hynrei ka Niaw Wasa ka la pynïakhaid kylla lyngba u Enrigue Malvin Marshra (26′).
Hadien ar minit ka Sein Pynbhalang ka la thep biang ïa ka kol kaba ar lyngba u Sambiang Wara Wet (28′) hadien ka jingïarap lang u Leiborki Ymbon. Hynrei u Civility Khongmalai (41′) u la lah ban pyniaphai kylla lyngba ka free-kick na ka bynta ban ïakhaid mar 2-2 kol ha ka kylla step.
Hadien ba la bteng biang ïa ka jingïakhun jong ka kylla miet, ka Niaw Wasa ka la ïoh ban thep ïa ka kol kaba lai lyngba u Buromlangki Salahe (52′). Hashwa ban wai ka Sein Pynbhalang ka la lah ban pynïakhaid kylla lyngba ka penalty ba la shut da u Bhoi (88′).
