New Delhi, Jylliew:
Kawei ka liengsuiñ Co.777 ba la pyniaid da ka tnat Pakistan International Airlines Corp. ka la shah bat bad pynsangeh noh ha Kuala Lumpur ha ka 29 tarik u Jymmang namar ka jingsah ram jong katei ka kompeni, ha kaba ia kitei kiba shong baroh la hap ban phah kit noh da kawei pat ka liengsuiñ na katei ka jaka ba shah bat ban leit poi sha ka jaka ba ki mut ban leit hiar.
U nongrah ktien ka PIA, Abdullah Hafeez Khan u la iathuh ba ka ïingbishar jong ka Malaysia ha katei ka sngi ka la bthah ban pynsangeh bad ban bat noh ia katei ka liengsuiñ.
Kumta u Khan u la ong ba ka PIA kan pyrshang shitom ban ioh pyllait noh kloi ia katei ka liengsuiñ bad la iathuh ruh ba katei ka pisa ba sah baroh la dep ban siew noh. Ka long ruh ka sien kaba 2 hadien ki 2 snem ba la leit ba ka liengsuiñ jong katei ka tnat kan shah bat ha katei ka ri jong ka South Asia.
Katba, na ka liang jong ka AerCap Holdings NV, kam shym la pynphai ktien ne ai jubab halor katei ka jingkren jong u Khan haba iadei bad ka jingpyllait noh ia katei ka liengsuiñ.
Ka PIA ka la mad ia ki jingeh kiba khraw haba iadei bad ka ioh ka kot jongka hadien ba ka European Union ka la khang pyrshah ia ka ban treikam hapoh jong u snem 2020 namar ka jinglap ia ki license thok jong ki nongñiah ‘Pilot’.
