Shillong, Jylliew 02:
Ka Khasi Hills Autonomous District Council (KHADC) ka la pynmih da ka byrta ban pyntip ba ki don bun bah ki ‘riew paidbah kiba la pynkylla ïa ka jait jong ki bad ban shim da ka jait ka kur Khasi da kaba pyndonkam da ka ‘Affidavit’.
Ha u kyrwoh khubor, u Registration Authority ka KHADC, u la ong ba ka kyndon 12 jong ka Khasi Hills Autonomous District (Khasi Social Custom of Lineage) Act, 1997, ka khang ban pynkylla ïa ka jait bad ban shim da ka jait ka kur Khasi khlem da ïoh shwa da ka jingthoh na u Registration Authority bad Executive Committee ka Khasi Hills Autonomous District Council.
Namarkata, ka Executive Committee ka la pyntip sha ki paidbah baroh ba mano-mano ruh kim dei ban pynkylla ïa ka jait jong ki bad ban shim da ka jait ka kur Khasi khlem da ïoh jingbit da ka jingthoh na u Registration Authority bad Executive Committee ka Khasi Hills Autonomous District Council katkum ki kyndon jong ka Khasi Hills Autonomous District (Khasi Social Custom of Lineage) Act, 1997.
Ha kajuh ka por, ka Executive Committee ka la bthah ïa baroh ki bor ba dei khmih kiba treikam hapoh u pud u sam jong ka Khasi Hills Autonomous District Council ba kim dei ban pdiang satia ïa ka jingpynkylla jait sha ka jait ka kur Khasi da kino-kino ki briew khlem da ïoh jingbit shwa da ka jingthoh na u Registration Authority bad Executive Committee ka Khasi Hills Autonomous District Council.
