Imphal, Jylliew:
Ha ka sngi kaba khatduh jong ka jingleit jong u sha Manipur, u Myntri Sorkar Pdeng ba dei khmih ïa ki tnat Kam Pohïing bad Cooperation, u Amit Shah ha ka 1 tarik mynta u bnai u la ïakren bad ki lad pathai khubor ha nongbah Imphal. Une Myntri u la kyntu ïa baroh ki bynta ka imlang sahlang ha Manipur ba kin pynthikna ïa ka jingïasuk, pynlong ïa ki jingïakren bad kyntiew ïa ka shongsuk shongsaiñ. U la kyntu ïa ki nongshong shnong ba kin kyntait ïa ki khubor hamsaia bad ba kin pynthikna ïa ka shongsuk shongsaiñ. Na ka liang jong ka Sorkar Modi, u la pynpaw ka jingsngewlem ïa ki longïing jong kito kiba la duh ïa la ka jingim ha ka jingïaumsnam ha Manipur.
U myntri u la ong ba hapoh ka jingai jingïarap pisa, ka Sorkar Pdeng bad ka Sorkar Manipur kin ai mar san lak tyngka lyngba ka DBT ïa ki bahaïing jong kito kiba la duh ïa la ka jingim ha ka jingïaumsnam. U la ong ba na ka bynta ka jingïatreilang jong ki kynhun kiba pynthikna ïa ka shongsuk shongsaiñ ha Manipur, yn seng ïa ka Inter-Agency Unified Command hapoh ka jinglong khliehduh u Security Advisor – Kuldeep Singh. U Myntri u la ong ba 6 tylli ki jingujor kiba kynthup ïa 5 tylli ki jingujor na baroh ki jingujor ba la ïoh pdiang bad kawei ka jingujor halor ka jingïasuhbuit ki dei ki ban buddien da ka kynhun ba kyrpang jong ka CBI. Yn wad ïa ka daw jong kane ka jingïaumsnam bad yn leh da kaba tyngeh ban pynshitom ïa kito kiba donkti ha kane khnang ban lait na kum kine ki jingjia hadien habud.
U Myntri u la ong ba khnang ban pynthikna ïa ka jingbteng jong ka jingpynpoi ïa ki mar ba kongsan sha Manipur, ka Sorkar India ka la phah 30,000 metric ton u khaw ha ryngkat kaba dei ban ïoh. Ha ryngkat kane, la pynbiang ruh ïa ki lad pynpoi ïa ki tyndong gas, ka petrol bad ki jhur. U la ong ruh ba ïa ka jingpynpoi ia ki mar ba kongsan sha Manipur na kiwei kiwei ki bynta jong ka ri yn pynthikna da kaba thaw ïa ka rynsan kaba shipor ha steshon rel Khongsang. U Myntri u la ong ruh ba ka jingai jingshakri ‘helicopter’ ba shipor ka dei kaba dang sdang na Churachandpur, Moreh bad Kangpokpi ban pynsuk ïa ka leit ka wan da kaba siew T 2000 shi khlieh ban pyndonkam ïa kane. U la ong ba ïa kaba sah jong ka jinglut jingep na ka bynta kane yn bah da ka Sorkar India bad ka Sorkar Manipur. U la ong ruh ba na ki 8 tylli ki kynhun nongai jingsumar ba la thaw da ka Sorkar India, 3 tylli ki kynhun ki la poi sha Manipur bad shen yn sa poi sa 5 tylli ki kynhun, kine ki kynhun kin pynbiang ïa ki lad ai jingsumar ha ki thaiñ Moreh, Churachandpur bad Kangpokpi
U Myntri u la ong ruh ban pynthikna ïa ka jingïaid beit ki eksamin bad ki lad ai jinghikai khlem kano kano ka jingthut na ka bynta ki khynnah pule jong ka Manipur, ki ophisar na ka tnat Pule Puthi jong ka Sorkar India, ha ryngkat ki ophisar ha ka Tnat Pule Puthi jong ka Manipur ki dang pynkhreh ïa ka rukom treikam ban pynbiang ïa ka jingai jinghikai, ki eksamin bad kiwei kiwei lyngba ki lad ‘online’ bad ba kane kan long ka ban pyndep ha kine ki ar sngi ban wan. U la ong ba la pynbiang ïa ki lad ban leit mih hakhmat ka Ïing shari Manipur High Court na Churachandpur, Moreh bad Kangpokpi lyngba ki lad ‘online’. U Myntri u la ong ba khnang ban pynthikna ka jingïaidbeit jong baroh ki jingpynbiang ha Manipur, ki ophisar ha ka kyrdan Joint Secretary na ka tnat Kam Pohïing jong ka Sorkar India bad san ngut ki ophisar ha ka kyrdan Director jong ki tnat sorkar bapher bapher kin don ha ka jylla.
U Myntri u la pyntip ruh ba ka jingpyrshang ïa ka jingker ia 10 km ki jaka khappud hapdeng ka Manipur bad Myanmar ka dei kaba la pyndep da ka Sorkar India, katba ka kam thep ‘tender’ ïa 80 km ka jingker ka dei kaba la pyndep bad ka jingleit peit bniah ïa ka jingker ha ki jaka ba sah ka dang ïaid shakhmat. U la ong ba la shim ïa ki ‘biometric’ bad ki ‘eye impression’ jong ki briew kiba wan na kiwei kiwei ki ri khnang ba yn ym don mano mano ba lah ban pynshit ia ka jingïaumsnam ha kane ka thaiñ. U Myntri u la ong ba kano kano ka jingpynkheiñ ïa ka soskular ‘Suspension of Operation’ ka dei ka ban pynbeit da kaba tyngeh bad yn kheiñ ba ka dei ka jingpynkheiñ ïa ka jingïakut, kito kiba don bynta ha kane ki dei ban bud ïa ki kyndon jong ka jingïakut. U Shah u la ong ba kito kiba don ïa ki suloi ki dei ban leit buh ia kine bad ki pulit, yn leh da kaba tyngeh ïa kito kiba don ïa ki suloi haba pynlong ka jingwad kaba bniah da ki pulit.
U Myntri u la kyntu ïa baroh ki kynhun ha ka imlang sahlang ba ka la dei ka por ban wanrah ïa ka jingïasuk bad kyntiew ïa ka jingïadei kaba bha ha ka imlang sahlang. U la ong ba baroh ki dei ban trei na ka bynta ka jingwanrah ïa ka jingïasuk bad ka jingpynthikna ia ka jinglong jingman kaba plie lad ïa ka jingïakren bad ka jingiasuk.
U Myntri u la ong ba ka jingïaumsnam hapdeng ki artylli ki jaitbynriew ka la sdang ha Manipur ha ka 29 tarik u Ïaïong. U la ong ba ha kine ki 6 snem ba la dep, ka Manipur ka la lait na ka jingpakhang, ka jingkhang surok bad ka jingïaumsnam bad hapoh ka jingïalam jong u Myntri Rangbah Duh – Narendra Modi bad u Myntri Rangbah – N. Biren Singh ka kor kaba ar bynta jong ka Sorkar Manipur ka la kot sha ka roi ka par ka bym pat ju ïohi ha baroh ki bynta jong ka jylla. U la ong ba kine ki 6 snem ba la dep ki dei ki snem jong ka roi ka par bad ka shongsuk shongsaiñ ha ka histori jong ka Manipur. La shim ia katto katne ki sienjam kiba kynthup ïa ka jingplie ïa ki jaka treikam jong ka Sorkar Pdeng ha ka thaiñ, ka jingkyntiew ïa ki jingdon jingem, ka jingwanrah ïa ka jingbei tyngka ha ki karkhana, ka jingpynkylla ïa ka Manipur sha ka jaka pdeng jong ki kam ïalehkai bad ki kam ai jinghikai ha ka thaiñ shatei lam mihngi lyngba ka jingïaid beit ïaid ryntih jong ki jaka ai jingpule.
U Myntri u la ong ruh ba ha kine ki sngi ba u la sah ha Manipur, u la ïakynduh ïa ki briew bapher bapher, ki jaka sah shipor jong ki shemlanot, bad u la ïakren ruh bad ki kynhun bad kito kiba mad ïa ki jingthombor ha Imphal, Moreh, Churachandpur bad Kangpokpi. U Shah u la ong ba u la pynlong jingïalang bad ka kynhun Myntri jong ka jylla bad ruh ki kynhun longkmie. Shuh shuh, u Shah u la pynlong jingïalang bad kumba 22 tylli ki kynhun na ka imlang sahlang jong ki Meitei bad kumba 25 tylli ki kynhun jong ki Kuki. U la ïakren ruh bad ki riewshemphang, ki ophisar ba la shongthait bad ki briew bapher bapher ha kine ki ar sngi ba la dep halor ki lad ki lynti na ka bynta ka jingwanrah biang ïa ka jing jai jai. La pynlong ruh ïa ki jingïakren bad ki nongïalehkai bad ki nongmihkhmat na ki kynhun saiñ pyrthei bapher bapher.
