London, Jylliew:
Kat kum ka khubor ba lah pyllait da ka klob Manchester United ka iathuh ba u rangialehkai shakhmat jong ka u Anthony Martial un hap ban duhnoh ia ka jingshim bynta ka jong u lem bad ka kynhun ialehkai baroh kawei ha ka jingia aireng FA Cup ha ka sngi saitjain pyrshah ia ka Manchester City na ka daw jong ka jingshitom ha ki kjat.
Nangta ruh ka khubor ka iathuh ba utei u rangialehkai na ri France u lah ngat ha kata ka jingmynsaw hadien ba u lah mih madan na kaba shah pynshong-ben ha ka jingiakhun pyrshah bad ka Fulham ha ka Sngi U Blei ba lah dep; kaba long ka jingiakhun kaba khatduh jong ka klob baroh kawei ha aiom ialehkai EPL kaba mynta. Ha katei ka jingialehkai ka Man United ka lah khur ia ka jingjop da 2-1 kol ha ka jing-iakhun kaba long ha Old Trafford.
Kumta, kum u rangialehkai ba paw jong katei ka klob ha ka liang shutbol, u Martial u la lah ban kamai ia ki 9 kol ha ki 29 tylli ki jingialehkai kiba u lah ioh ban mih madan ha kane ka pateng ba mynta, hynrei uba lah shah teh lakam pat namar ki jingmynsaw kiba u lah ngat.
Dei tang ha ki 11 jong ki 21 tylli ki jing-ialehkai kiba u lah ioh ban mih madan na ka kynhun ha kaba u lah ioh ban shimbynta bad iadonlang bad ka kynhun 1st XI. Namar kata, u don pat ia ka jingkyrmen ba un iaisah ha ka jingialeh na ka bynta ban sdang ia ka jingialehkai sa shisien pat ha Wembley pyrshah ia ka City; ka klob kaba ialeh mynta na ka bynta ban rah ia ka sien jop kaba laisien lynter ha ka lympung ialehkai kaba kynthup naduh ka Premier League, FA Cup bad Champions League.
