Shillong, Jylliew 04:
Ka jingdon jong ki briew kiba khlad na ki jia aksiden kali ha East Khasi Hills naduh u snem 2022 haduh u Ïaïong mynta u snem ka long 62 ngut.
Katkum ki jingtip na ka tnad pulit ka East Khasi Hills, ki don 78 tylli ki jingjia aksiden kali (ha surok) naduh u Kyllalyngkot jong u snem 2022 haduh u Ïaïong, 2023.
Ha kajuh ka por, ka jingdon jong ki briew kiba khlad na ki jingjia aksiden kali hapoh ka distrik ka long 62 ngut ba kynthup ïa 47 ngut ha u snem 2022 bad 15 ngut haduh u Ïaïong mynta u snem.
Nalor kine, ki don ruh 75 ngut kiba la mynsaw na kitei ki jingjia aksiden kali ba kynthup ïa 63 ngut ha u snem ba la dep bad 12 ngut haduh u Ïaïong, 2023.
Ka tnad ka la kdew ruh ba ki jaka kiba kham jur ki jingjia aksiden ki kynthup ïa ka NH-44 (Surok Jowai), NH-40 (Ryndang Briew bad Mawïong Umjapung), Surok Shillong By-Pass (Ummir), NH-44 (E) ha ka thaiñ 6 Mer, Major District Road (Laitryngew), NH-6 (Laitkor) bad NH-6 & Surok Shillong By-Pass (Puriang, Mawryngkneng, Umkhen bad Thangshalai).
Ha kawei ka liang, haba phai sha ka jingñiah kali ha ryngkat ka jingdih kyiad, ka tnad ka la lap kumba 90 tylli ki jingjia ba kynthup ïa 67 tylli ha u snem 2022 bad 23 tylli haduh u Ïaïong mynta u snem.
Kumjuh, ki don 32,361 tylli ki jingjia naduh u snem ba la dep haduh u Ïaïong mynta u snem ha kaba ka tnad ka la daiñ kuna namar ka jingpynkheiñ ïa ki kyndon ñiah kali.
Ka khajna ba la ïoh lum na ka jingdaiñ kuna halor kitei ki 32,361 tylli ki jingjia ka long T. 2,27,00,700 ba kynthup ïa T.1,83,70,100 ha u snem 2022 bad T.43,30,600 haduh u Ïaïong mynta u snem.
Haba ïakren bad u Superintendent of Police (City), Bah Vivek Syiem halor katei ka bynta, u la ong ba ka tnad na ka por sha ka por ka ju pynlong ïa ka jingpeitngor ïa ki kali ha ki jaka sor bad khap sor kum shi bynta ban tehlakam ïa ka jingñiah kali thurmur.
U la ong ruh ba ha shuwa ban ïoh ïa ka laisen kali, ki paidbah ki dei ban shai bha shuwa ïa ki kyndon ba ïadei bad ki kam ñiah kali, bad ban tip bha ruh shaphang ka aiñ ‘Motor Vehicles Act’.
Shuh shuh halor ka jingñiah kali hadien ba la dih kyiad, u Bah Syiem u la bynrap, “Ki nongñiah ki dei ban sngewthuh ba ha ka por ba ki ñiah kali, kim dei ban dih kyiad. Kaba biang eh ka long ba ynda la dih kyiad, nai ñiah kali shuh ban lait na kino-kino ki jingmynsaw ne jingjia ba sngewsih.”
