Agartala, Jylliew:
Kumba 30 ngut ki bor pahara jong ka tnat shipai Border Security Force (BSF) na ka border outpost ha ka thaiñ Unakoti district jong ka jylla Tripura ki la poi hospital ha ka sngi Balang ba la dep na ka daw jong ka jingsuba ïoh bih na ka bam. Kat kum ka jingïathuh jong ki bor pulit ka jylla, ki la pyntip ba kitei ki shipai BSF ki dei na ka Battalion No 199, Latiapura border outpost.
Kat kum ka jingïathuh jong u Sun-Divisional Police Officer, Kailashahar – Shibu Chandra Dey u la pyntip ba khyndiat ngut na kitei ki shipai ki la ïoh ïa ki jiingshitom kiba malu mala bad la leit ban on biang ïa ki sha border outpost (BOP) hadien ba ki la ïoh ïa ki lad jingsumar. U heh pulit u la pyntip ba ki don haduh 21 ngut ki shipai kiba kham shitom jur bad la sumar ïa ki ha kawei ka hospital kaba marjan bad katei ka BOP.
Na ka liang u Dr Sankha Subha Debnath jong ka Kailashahar’s Rajiv Gandhi Memorial Hospital u la pyntip ba ïa ki 16 ngut ki shipai la sumarha katei ka hospital, katba ïa 5 ngut kiwei pat la leit ban rah sumar sha kawei ka district hospital kaba marjan. U la pyntip shuh shuh ba kitei ki shipai ki la lait na ka jingma, hynrei dang donkam pat ban khmih bniah ïa ki jinglong jingman ha ka liang ka koit ka khiah jong ki.
Kat kum ka jingïathuh jong u wei napdeng ki shipai (Kunal Minj) u la pyntip ba hadien ba ki shipai ki la dep ban bam ïa ka ja sngi bad na ka daw jong ka jingshit kyrang jong ka sngi, ki la ïoh ïa ka jingpang shit, prie, bad suh kpoh.
Halor katei ka jingjia, na ka liang ka kynhun jong ka tnat koir khiah ka jylla ka la leit ban lum ïa ki nongmuna jong ka bam bad ka umdih ba la sam sha kitei ki shipai kiba la kem pang.
