Itanagar, Jylliew:
Ka Gauhati High Court ha ka 1 tarik mynta u bnai ka la bthah ïa ka Sorkar jong ka jylla Arunachal Pradesh ba kan shim da ki sienjam ban pyndait ïa ki kor CCTV ha baroh ki thanat pulit kiba don ha kylleng ki bynta jong ka jylla. Na ka liang ka Ïing Kashari ka la pyntip ruh ba ïa ki jinglum jingtip na kitei ki kor CCTV yn khmih bad pynïaid lyngba kawei ka ‘control room’.
Kat kum ki jingïoh lum jingtip la ïathuh ba ka Gauhati High Court ka la pynmih ïa katei ka hukum hadien ka jingïoh pdiang ïa kawei ka PIL hadien ka jingjia shah pynïap jong ki 2 ngut ki nongleh be-i-jot ha ki paidbhur kaba la jia ha u bnai Rymphang jong u snem 2018. Kitei ki 2 ngut ki nongleh be-i-jot ki la shah pynïap hadien ba ki paidbhur kiba don kumba 1,000 ngut eiei ki la leit ban tan bad paring ïa ki na Tezu PS, Arunachal Pradesh.
Ki 2 ngut ki runar kiba la shah pynïap ha ki paidbhur ki kynthup ïa u Sanjay Sobor (30 snem ka rta) bad u Jagdish Lohar (25 snem ka rta). Kitei ki 2 ngut ki dei kiba la donkti ban leh be-i-jot ïa kawei ka khynnah rit kaba dang 5 snem ka rta.
