Guwahati, Jylliew:
U Myntri Rangbah jong ka jylla Assam, u Himanta Biswa Sarma ha ka ki khyndiat sngi kiba la leit noh u la bthah ïa ka tnat Pule Puthi jong ka jylla ba kan thaw da ka ‘high-level committee’ ban lum jingtip halor ka jingjia takhuh kali kaba la wanrah ruh ïa ka jingkhlad jong 7 ngut ki samla pule ka Assam Engineering College.
Hynñiew ngut ki samla pule ka Assam Engineering College ki la khlad ha ka 29 tarik u Jymmang hadien ba ka kali kaba ki ïa shong ka la leit ban tynrah ïa uwei u ‘divider’ bad ïatakhuh sa bad kawei ka kali.
Kat kum ka jingpyllait kyrwoh na ka shlem trei kam jong u Myntri Rangbah la ïoh jingtip ba la bthah ïa u ‘principal’ jong ka kolej bad ïa u superintendent jong ka hostel (ba shong ba sah kitei ki samla pule) ba kin shim shuti shwa shipor tad haduh ba ka komiti ka la lah ban pyndep ïa ki jinglum jingtip bad tad haduh ba ka sorkar jylla ka la dep ban khmih bniah ïa ka kaiphod.
Ha kaba ïadei bad ka jingjia ïatakhuh kali, kat kum ka jingpyntip jong u Director General of Police – G P Singh u la ïathuh ba katei ka jingjia ka la jia na ka daw jong ka jingbuaid khawiang, hynrei ïa katei yn lah ban pyntikna hadien ba la dep ki kam tohkit.
Nalor kata, na ka liang u Myntri Rangbah u la bthah ruh ïa ka tnat Pule Puthi ba kan thaw sa ïa kawei ka komiti ka ban khmih halor ki jinglong jingman jong ki kolej bad skulbah kiba don ha kylleng ki bynta jong ka jylla ha kaba ïadei bad ka jingjied ïa ki nongïalam jong ki jaka pule hapdeng ki samla pule.
Shuh shuh na ka liang u Myntri Rangbah u la bthah ruh ïa ka tnat pule puthi ba kan thaw sa ïa kawei ka kynhun na ka bynta ban pynkhlaiñ ïa ki aiñ ki kanun ha ki hostel jong ki jaka pule. Katei ka kynhun kan khmih bniah halor ki mat kiba ïadei bad ka jingpyntreikam pura ïa ki aiñ ki kyndon, ban tehlakam ïa ka jingpyndonkam ïa ka kyiad bad ïa u droks, bad kiwei kiwei ki jingeh.
