Nongstoiñ, Jylliew 04:
Ka jingkem noh jong ki pulit ka thanad Nongstoiñ ha ka 31 tarik u Jymmang ïa uwei u briew uba shah kynnoh donkti ban leh be-ijot ïa uwei u khynnah na kawei na ka shnong ha West Khasi Hills kumjuh ïa 22 ngut kiwei pat (ki khynnah) lem bad 15 ngut kiba u la pyrshang, hynrei da ka jingïakhun ki la lah ban lait noh na ki tyrsim jong u.
Kumba la pyntip da ki nongïalam shnong haba kren sha ki nongthoh khubor, la ong ba utei u briew u la pyndonkam da kaba pynthame bad pynbiej da kumne-kumtai ïa kitei ki khynnah.
Ïa kane la pyntikna ruh da ki nongïalam shnong haba kren sha ki nongthoh khubor ha ka Sngi Saitjaiñ hadien ba la pynlong ïa ka dorbar ha katei ka shnong.
U Sordar katei ka shnong u la ong ba katkum ka jingïathuh ki kmie ki kpa haba ki kylli na la ki khun – ka long ba utei u briew u ju pynthame bad pynbiej ïa ki ba un ai da kino-kino ki kynja tiar lane u ju ïawer ïa ki ba kin leit thiah lang bad u, bad ïawer ruh ba kin leit bad u sha kino-kino ki jaka kiba long khlaw.
La ïathuh ruh ba u pynbiej ïa kitei ki khynnah da kaba ong ba un ai ïa ki tiar kum ka ‘mobile’ ban pynbiej ïa ki bad kiba bun na ki, kim pat sngewthuh ïa kata ka kam kaba u leh ne thmu bad ki shu ngop bad shu ngeit beit ïa kat kaba u ong.
Shuh shuh u la ïathuh ba haba ïadei bad kitei ki longïing kiba la ngat ha katei ka apot, ki khyllung-khynnah ki la sah mynta ha ka umdum bad ka shnong ka la pyrkhat ba ïa kine ki khynnah hap ban ïa sngewthuh bad ki bor ka aiñ lane ai ka jingïasyllok khnang ba kan ym ktah ïa ka jingmut jingpyrkhat jong ki.
