Tura, Jylliew 04:
Ki nongmihkhmat na ka Scheduled Caste (SC) jong ka Ri-lum Garo ki la phah dorkhas sha u Myntri Rangbah ka Jylla, u Conrad K. Sangma ban kyrpad ïa ka bhah kaba 5% ha ki kam Sorkar na bynta ki dkhot jong ki.
Wat la ki long ka bynta kaba khraw haba ïadei bad ka jingbhah hapoh India, ki jaidbynriew SC hapoh ka Jylla ki hap hapoh ka ‘General Category’ bad ym hapoh ka thup jong ka jingbhah, ha kaba 85% ka jingbhah ka leit sha ki jaidbynriew ’riewlum bapher-bapher jong ka Jylla.
Lyngba ka dorkhas ba la phah da ka ‘email’ sha u Myntri Rangbah, ki nongïalam SC ki la pyntip ba kumba ka long mynta, ki don kumba 25,000 ngut na ki 5 tylli distrik kiba hap hapoh ka kyrdan SC ne kumba 58 na ka jingbun briew hapoh ka Jylla. Hynrei namar ka jingbhah kam, kane ka kyrdan ka la long kaba shah ktah eh na baroh ki nongshong shnong ka Jylla naba kam shym la don kano-kano ka jingbhah kaba la ka jong na bynta jong ki.
“Hashuwa, ka 5% ka kynthup ïa ki Bodo, Koch, Rabha, Hajong bad ki SC hynrei hadien ka jingkynthup ïa ki jaidbynriew Mann, mynta 6 jaidbynriew ki ïoh tang 5% jong ka bhah kaba long ka jingbym hok kaba khraw. Katba kiwei-kiwei ha ka thup la ithuh kum ki ’riewlum, ïa ki SC la pynngat ha ka thup ‘Non-Tribal’,” la ong ka dorkhas.
Ki la pynpaw ruh ka jingsngew ba kam ïahap bad ym katkum ka riti synshar ka ri ban kynthup ïa ki ST (Other Tribe) bad ki SC ha kajuh ka bhah.
Ki dkhot ki la pynsngew ba ha kaba ïadei bad ka jingleit pule ‘Medical’ ne Nos, ym tang iwei ruh na ka jaidbynriew jong ki, ki la ïoh mihkhmat. Kumjuh, ha ka District Selection Committee, ym don iwei ruh napdeng ki 17 ‘seat’ na bynta ki nongtrei ‘Surveillance’ ba la ai sha ki SC ne wat sha kito ha ka thup ‘General’.
“Wat ha ki ‘Unreserved Post’ hapoh ka Jylla, ki kam ki leit tang sha kawei ka jaidbynriew hapoh ka Jylla, ha kawei ka liang ka long ka jingpynkheiñ. Wat ha ka pule-puthi, ym shym la don ka jingmang ba la ka jong na bynta ki jaidbynriew ba duna ha ka ïoh ka kot ban kyntiew ïa ngi ki SC. Kumta, ka jingbym pynbiang ïa la ka jong ka bhah na bynta ki SC ha ka ‘Roster System’ kan ym long kaba biang. Namar kata, ngi kyrpad ïa ka bhah kaba 5% na bynta ki SC kiba na kane ka Jylla,” la bynrap ka dorkhas.
