Agartala, Jylliew:
Ki bor pulit jong ka jylla Tripura ha ka 2 tarik mynta u bnai ki la pyntip ba ki la ïoh ban kem ïa 3 ngut ki briew ha ryngkat T.56 lak ka pisa (baroh da ki lut T.2000) na ka thaiñ Dhalai district, Tripura.
Ki bor pulit ki la ïathuh ba ki la kem ïa kitei ki 3 ngut hadien ba kim shym la lah ban pynbiang ïa ki jubab ne ki daw balei ba ki la kit ïa haduh T.56 lak ki lut 2,000 kiba ka Reserve Bank of India ka la pynbna ban pynduh noh ïa ki.
Ki 3 ngut ki briew kiba la shah kem ha katei ka sngi ki kynthup ïa u Kishore Kumar na ka jylla Uttar Pradesh, Rajan Kumar Sonia na Bihar bad u Sonkumar na Maharashtra. Ïa kitei ki 3 ngut, ki bor pulit ki la ïoh ban kem na kawei ka kali kaba don ïa u ‘registration number’ jong ka jylla Uttar Pradesh. La kem ïa kitei ki 3 ngut katba ki dang don ha ka lynti ban leit sha ka nongbah Agartala na ka shnong Ambassa.
Kat kum ka jingïathuh jong ki bor pulit, ki la pyntip ba ki la ïoh ban pynsangeh ïa katei ka kali ha ka khyrdop talasi kaba don ha ka shnong Bethbagan.
Hadien katei ka jingjia, la ïathuh ba ïa kitei ki 3 ngut la leit ban rah noh sha thanat na ka bynta ban pynlong ïa ki jingtohkit kiba dang sah. Ki bor pulit ki la pyntip shuh shuh ba lada kitei ki 3 ngut kim shym la lah satia ban pynbiang ïa ki jubab kiba janai, ka tnat pulit kan khot ïa ka bor sorkar ka Income Tax ban tohkit pyrshah ïa ki.
Na ka liang ki bor pulit ki la pyntip ruh ba kitei ki 3 ngut ki la ïathuh ba ki dei ki briew kiba pynïaid ïa kawei ka jaka die jingdeng ksiar kaba don ha ka jylla Uttar Pradesh ba ki la wan sha ka thaiñ Ambassa ban kylliang ïa ki lut 2,000.
