Guwahati, Jylliew:
Da ka jingïai bteng ïa ki jingkhynra pyrshah ïa ki nongleit nongwan bad nongshong rel khlem tiket, ki nongtrei ka North East Frontier Railways (NFR) ha u snem mang tyngka ba la dep ki la ïoh ban lum haduh T.62.98 klur ka kuna na ki nongleit nongwan kiba kiew bad shong beaiñ da ki rel khlem da don ïa ki tiket.
Kat kum ka kyrwoh ba la pyllait da u Chief Public Relations Officer ka NFR u la pyntip ba ïa ki jingkhynra la leit ban pynlong kum shi bynta ban tehlakam ïa ki nongleit nongwan khlem tiket kiba bunsien ki ju wanrah ïa ki jingeh kiba khraw na ka bynta kito ki nongleit nongwan kiba don ïa la ki jong ki tiket.
U heh ka NFR u la pyntip ba dang ha u bnai Ïaïong jong une u snem ba mynta, ka NFR ka la ïoh ban lum ïa haduh T.4.81 klur ka kuna na ki nongleit nongwan khlem tiket.
U la ïathuh shuh shuh ba naduh u bnai Ïaïong, 2022 tad haduh u bnai Lber, 2023 ka NFR ka la ïoh ban pynrung ïa haduh 77,8808 tylli ki mokotduma kiba ïadei bad ki nongleit nongwan khlem tiket bad ïoh ruh ban lum ïa ka kuna kaba la kot shaduh ka T. 62.98 klur.
U la pyntip shuh shuh ba ka jingïoh daiñ kuna na kitei ki nongleit nongwan ka la kiew haduh 73.68%, bad jur palat 169.56% ban ïa kaba ïanujor bad ki snem kiba la leit noh.
Na ka liang u khlieh ka NFR u la pyntip shuh shuh ba ki nongleit nongwan lane ki nongshong rel khlem tiket kiba kyntait ban siew kuna, kin shah pynshitom kat kum ki kyndon jong ka Railways Act, 1989.
Na ka liang ka NFR ka la kyntu ïa ki nongleit nongwan baroh ba ki dei ban don ïa ki tiket shong rel kiba dang trei kam bad kumjuh ruh ban pynbiang ruh ïa ki ‘Identity card’ kiba dang trei kam na ka bynta ban lait na kino kino ki jingeh.
