Tura, Jylliew 04:
Ka AHAM ha ka Sngi U Blei ka la kyrpad ïa u Myntri Rangbah ka Jylla, u Conrad K. Sangma ban pynurlong ïa ka jingdawa ba sahteng ha ka ban pynlong ïa ka Tura kum ka nongbah ha ka por tlang (ha Tura), ka mat kaba la pynsngew dang shen da ka ACHIK lem bad kiwei-kiwei ki kynhun seng.
Na ka liang ka seng, ka la aiti ruh ïa ka jingthoh sha u Myntri Rangbah halor kane ka bynta.
“Phi sngewthuh ba kane ka dei ka jingangnud bad ka jingdawa ba la slem jong ki nongshong shnong ka Tura bad ka Ri-lum Garo baroh kawei ban pynlong ïa ka Tura kum ka nongbah ha ka por tlang jong ka Meghalaya. Kane ka dei naduh ka por ba la thaw ïa ka Jylla bad ka jingïamynjur hapdeng ki nongïalam na ka jaidbynriew Garo, Jaiñtia bad Khasi ka long ban pynïeng ïa 2 tylli ki nongbah na bynta ka Jylla – Tura kum ka nongbah ha ka por tlang, naduh u Risaw haduh u Lber bad ka Shillong kum ka nongbah ha ka por lyïur, naduh u Ïaïong haduh u Nailur. Ym shym la burom ïa kane ka jingmynjur bad ka Tura ka la shah knieh noh ban ïoh long kum ka nongbah ha ka por tlang bad la shu ieh noh kumto da ki Sorkar bapher-bapher, kaba long ka jingleh bym hok ïa ki paidbah ka Tura bad ka Ri-lum Garo,” la ong ka seng ha ka dorkhas.
Ka seng ka la kdew ruh ïa bun tylli ki daw ban pynurlong ïa katei ka jingdawa – ban pynlong ïa ka Tura kum ka nongbah ha ka por tlang.
“Ki Garo ki ïapher bak-ly-bak na ki Khasi/Jaiñtia naduh ka rukom long, lariti bad ka ktien ka thylliej. Ka jingthmu ba tynrai ban phiah noh ïa ka Meghalaya kum ka Jylla na ka Assam ka long na bynta ban pynneh-pynsah bad ka jingnang kiew jong ka jinglong ba kyrpang, lariti bad jaka jong ki 3 tylli ki jaidbynriew hapoh ka Jylla. Naduh ba la thaw ïa ka Meghalaya bad ka Shillong kum ka nongbah, ka jingïoh Jylla lajong ka la ai jingmyntoi tang ïa ki jaidbynriew Khasi/Jaiñtia ha baroh ki liang – ka roi ka par bad ka jingnang kiew ha ka imlang-sahlang naba baroh ki tnad treikam Sorkar bad ki jingdon-jingem la pynleit jingmut tang ha ka thaiñ Khasi-Jaiñtia, katba ki Garo lem bad ka Ri-lum Garo la shah ieh beiñ bad shah knieh noh ïa ka jingithuh kaba long ka jingkheiñ beiñ naba ka Jylla ka dei jong baroh 3 tylli ki jaidbynriew,” la ong ka seng da kaba bynrap ba ka jingpynlong ïa ka Tura kum ka nongbah ha ka por tlang kan pyntikna ïa ki jingmyntoi bapher-bapher hapoh ka thaiñ.
Ka seng ka la kdew ruh ba ka nongbah ba mynta ka jngai bha na bynta ki paidbah ka Ri-lum Garo bad ka buh jingeh khamtam ïa kito na ki jaka ba kyndong. Ka la bynrap ba ka leit ka wan sha ka nongbah kam long kaba suk naba ka tuh ïa ka por kumjuh ki jingdon-jingem bad bun ki paidbah kim kot bor.
Ha kajuh ka por, ka seng ka la pynkynmaw ba ka jingdon jong 2 tylli ki nongbah la bud ha katto-katne ki Jylla jong ka ri na bynta ka bit ka biang ha ka liang ki bor pynïaid bad ka synshar khadar kaba bha, da kaba buh jingmut ïa ka jinglong-jingman nalor kiwei-kiwei ki daw.
“Ka Jammu & Kashmir, Himachal Pradesh, Andhra Pradesh ki long ki katto-katne ki Jylla. Ka Meghalaya ka dei ban bud ïa kane na bynta ka bha ka miat jong ki paid nongshong shnong ka Ri-lum Garo kiba la shah ieh noh la slem bah ha ka liang ka jingithuh bad ka roi ka par,” la ong ka dorkhas.
