Shillong, Jylliew 04:
Ka Voice of the People Party (VPP) ka la pynpaw ïa ka jingkmen kaba khraw halor ka jingjop jong ka jaitbynriew ha ka jingïaleh ban pynkohnguh ïa ka sorkar ban thung ïa ka ‘Expert Committee’ ban pynkylla ïa ka polisi bhah kam jong ka jylla.
“Ha kane ka bynta ngi ai ka burom sha U Blei Nongbuh Nongthaw uba la leh ïa ki kam isynei jong u. Ha kane ka bynta ka seng VPP ka pynpaw ïa ka jingsngewnguh ïa baroh ki ba la don bynta ha kane ka jingïaleh jong ka jaitbynriew Hynñiewtrep ba la lam khmat da ka seng,” la ong u Dr Batskhem Myrboh, nongaiktien ka VPP ha ka Sngi U Blei lyngba u kyrwoh khubor.
U Dr Batskhem u la ong ba ka jingsngewnguh ka long ïa ki Rangbah nongïalam jong ki kynhun niam/Balang bapher bapher, ki longkmie bad ki khun samla kiba la wan ban ai ïa ka jingkyrshan bad khamtam ki jingduwai ba la ïoh ban pynlong ha ka jaka ba don ka jingshah jingit u President ka VPP, u Bah Ardent M. Basaïawmoit, hajan Additional Secretariat.
“Ngim lah ruh ban klet bad khlem da pynpaw ka jingsngewnguh ïa baroh ki ba pynlong ïa ki jingduwai na ki ïing ki sem jong phi,” u la ong.
U la ai khublei ruh ïa ki bor pynïaid District (District Administration) naduh ki ophisar bad kiwei pat ki nongtrei ba ki la pynthikna ba ka prokram shah jingit ka long kaba ïaid beit ïaid ryntih.
“Ngi ai ruh ka jingkhublei ïa ki doktor bad ki nos kiba la ai ïa ka jingshakri jong ki ban peit pyrman ïa ka koit ka khiah jong u President ka seng,” la ong u Dr Batskhem.
Nalorkata, ka VPP ka la ai khublei sha ki kynhun seng (pressure group), ki seng longkmie bad ki seng samla shnong bad kiwei pat ki kynhun ha ka jylla kiba la wan ban ai ïa ka jingkyrshan jong ki.
Ka VPP ka la ong ruh ba ka jingkhublei ba kyrpang ka leit ruh sha kito kiba don ka jingduna ha ki dkhotmet (differently-abled persons) kiba don ha kylleng ka Ri Khasi kiba la ai ka jingkyrshan ba sngur jong ki.
“Ka jingkhublei ka leit sha ki paidbah kylleng ka Bri u Hynñiewtrep: kynthei, shynrang, samla bad khynnah rit ruh kumjuh kiba ieh ïa ki kam ki jam jong ki bad ban pynlut la ka bai sngi bad kali ban kyrshan ïa kane ka jingïaleh. Ym tang ba ki wan ban ïa don ryngkat ha ka jaka shah jingit hynrei ba ki la pynlong ruh ïa ki jingïalang bad jingïaid paidbah ha kylleng ki jaka ban pynbor ïa ki MLA jong ki ban kren halor ka mat jong ka polisi bhahkam,” la ong u Dr Batskhem.
Shuh shuh ka VPP ka la ai khublei kyrpang sha ki samla pule kiba la mih ryntih ban kyrshan ïa kane ka jingïaleh, ïa ki dkhot jong ka seng na ki shnat bapher bapher bad ki paidbah kiba la synran ban ap miet ha ka jaka shah jingit, bad ïa ki ‘volunteer’ kiba la pynlut ïa la ka sngi ban pynthikna ba kiei kiei baroh kin ïaid beit ïaid ryntih.
