KYIV, Jylliew:
U President ka Ukraine, u Volodymyr Zelensky ha ka Sngi Saitjaiñ u la pynbna ba ka Ukraine ka long ba la pynkhreh ban iakhun tyngeh noh ia ka Russia khnang ba kan ioh ruh ban kurup biang noh ia kito ki bynta jongka, kiba la shah knieh bad shah kam trai ha ka Russia ha ki khyndiat por ba la leit.
Haba iakren bad ki lad pathai khubor ha katei ka sngi, u Zelensky u la ong ba ka Ukraine ka long ba la pynkhreh ban iakhun pyrshah noh ia ka Russia bad ba u don ruh ka jingngeit kaba skhem ba ka Ukraine kan jop beit namar ka dei ka hok jongka ruh ba kan ioh ban knieh biang noh ia kitei ki bynta kiba la shah kurup bad kam trai ha ka Russia.
Watla, ym lah ban tip ia ka jingshim por jong katei ka jingiakhun, hynrei ka Ukraine kan iakhun da ki rukom kiba bun bad kiba kham pher. Hynrei la tip tikna pat ba ka Ukraine kan jop.
Kumta la ong ba kitei ki rukom iakhun thma kiba ka Ukraine kan sdang nangne shakhmat kan pynkylla dur lut ia baroh ki jinglong jingman jong ka thma kaba la sdang da ka Russia ha ki 15 bnai ba la leit.
Shuh shuh ruh u Zelensky u la ong ba ka Ukraine ha une u bnai ba la leit, ka Ukraine ka dang pynap ban ioh pynhiar kput ia ka Russia ynda la ioh ia ki tiar bad ki kali iakhun thma kiba kyrpang kiba la kular ban pynpoi da ki ri na West. Namar kumba la iohi ruh ba ha kine ki khyndiat por ba la leit, utei u nongialam ka Ukraine u la kyrpad ia ki ri na West baroh ba kin ai ka jingkyrshan ba ratbah naka bynta ka Ukraine khnang ba kan lah ban iada ia la u jong u pud- u sam bad ba kan lah ruh ban ioh knieh biang noh ia kito ki bynta baroh kiba la shah knieh ha ka Russia ha ki por ba la leit naduh ba sdang jong ka thma.
