Gangtok, Jylliew:
U Myntri Rangbah jong ka jylla Sikkim, u Prem Singh Tamang ha ki khyndiat sngi kiba la leit noh u la pyntip ba ka ïoh ka kot jong ka jylla ka la sdang ban kiew naduh ba ka seng ka jong u, ka Sikkim Krantikari Morcha (SKM) ka la ïoh ban synshar ïa ka jylla ha u snem 2019.
Haba ai jingkren ha ka jingïalang rakhe ïa ka jingdap 4 snem jong ka sorkar SKM, na ka liang u Myntri Rangbah u la pyntip ba ka jingïohlum khajna jong ka sorkar ka la kiew da 57% naduh u snem 2019. Na ka liang u Myntri Rangbah u la pyntip shuh shuh ba ka sorkar jylla ka la shim da ki lad ki lynti kiba paka khnang ban lah kyntiew shuh shuh ïa ka ïoh ka kot jong ka jylla khlem da pynthut ne ktah ïa ki nongshong shnong ka jylla.
U la ong ba baroh ki nongshong shnong ka jylla ki dei ban ïatylli lang kawei ban trei kum ka kynhun ka ban ïalam ïa ka jylla sha lynti jong ka roi ka par bad ka ïoh ka kot. Na ka liang u Myntri Rangbah u la ai ruh ïa ka jingïaroh kaba khraw ïa ki nongshong shnong ka jylla kiba la don bynta ban trei na ka bynta ka bha ka miat bad ka ïoh ka kot jong ka jylla Sikkim.
Ïa ka jingïalang rakhe ïa ka jingdap 4 snem jong ka sorkar SKM la rakhe 4 sngi hadien ka tarik kaba pura namar ba u Myntri Rangbah u dang don ha nongbah Delhi.
Ha ka jingïalang na ka liang u Myntri Rangbah u la pyntip ba u la leit ruh ban rah ïa ki mat kiba donkam ban pynsngew ha u Myntri Rangbahduh jong ka ri – Narendra Modi kum ha kaba ïadei bad ka ‘reservation’ jong ki ‘assembly seat’ na ka bynta ki nongshong shnong trai muluk na ka jaitbynriew Limbu bad Tamang bad kumjuh ruh halor ki mat kiba ïadei bad ka jingdawa Scheduled Tribe (ST) jong ki 12 tylli ki kynhun jaitbynriew ritpaid.
