Shillong, Jylliew 04:
Ka Laban Sports Club Table Tennis Academy ka la lah ban ïakhun tyngeh ha ka lympung 2nd Meghalaya Open Table Tennis, bad ïoh khur haduh 7 tylli ki takma ksiar bad 3 tylli ki takma rupa.
Ha kane ka lympung kaba la long ha ka 2 bad 3 tarik mynta u bnai ïa kaba la pynlong da ka Laban Sports Club Table Tennis Academy la wan ban ïashim bynta da ki khynnah bad ki samla ha ki rta bapher bapher.
Na ki 18 tylli ki takma kiba la sam ha ka sngi ba khatduh, ka Laban Sports Club Table Tennis Academy ka la ïoh khur 7 tylli ki takma ksiar bad 3 tylli ki takma rupa.
Haba phai sha ka Under-15 Boys Singles u Debobrata Paul u la pynliem ïa u Sagnik Choud-hury, baroh ar na Laban Sports Club Table Tennis Academy. Ha ka Under-19 Boys Single u Kapil Biswakarma (Laban SC-TTA) u la jop ïa u Labeeb Faisel Ahmed. Ha ka Men’s Single u Suranjit Dey (Laban SCTTA) u la ïoh rah da kaba pynliem ïa u Sandeep Kumar.
Ka Tanushree Dasgupta, kaba mih khmat ïa ka Laban SCTTA ka la ïoh rah ïa ka Women’s Single da kaba pynliem noh ïa ka Diva Tang.
Ha ka Veteran Single, u Amit Gupta (Laban SCTTA) u la jop ïa u Santanu Ghosh. Ha ka Men’s Double, ki shijur u Suranjit Dey bad u Sandeep Kumar (Laban SCTTA) ki la pynliem noh ïa u Santanu Ghosh bad Rituraj Shabong ban ïoh rah ïa ka nam lahduh.
Ha ka Veteran Dou-bles, u Bishnu Joshi bad Santanu Ghosh ki la jop ïa u Ranjan Deb bad Biswajit Das Gupta. U Debobrata Paul (Laban SCTTA), u la ïoh rah ïa ka nam “Most Promising Player of the Tournament” na ka bynta ka jinglah ban ïalehkai bha jong u.
Ha kane ka lympung la ithuh ruh ïa ka jingnoh synñiang u (L) BC Bania, u nongseng ïa ka jingïa-lehkai Table Tennis ha Meghalaya. Ka Kong Wastenot Shabong, kurim late BC Bania, ba la bei tyngka ïa ka Men’s and Women’s Singles Cham-pion Trophy, ban kynmaw burom ïa ki kam jong u.
Ha ka Under-15 kiba jop ki la ïoh ïa ka khusnam pisa ba T.5000, katba kiba wan ba-ar ki la ïoh T.3000. Ha ka Under-19, kiba jop ki la ïoh T.6000 bad ba wan ba-ar ki la ïoh T.4000. Kiba jop ïa ka Men’s and Women’s Singles ki la ïoh ïa ka song kaba T.10 hajar, katba kiba wan ba-ar ki la ïoh T.8000. Ha ka Men’s Doubles bad Veteran Singles, ki nongjop ki la ïoh T.7000 bad kiba wan ba-ar ki la ïoh T.5000. Kumjuh kiba jop ïa ka Veteran Doubles ki la ïohpdiang T.7000 bad ba wan ba-ar ki la ïoh T.5000 ka khusnam pisa.
