Shillong, Jylliew 04:
Ka Voice of the People Party (VPP) ha ka Sngi U Blei ka la pynrem jur ïa ka rai jong ka sorkar MDA ban pynïaid pud sngi lane ‘Odd-Even’ ïa ki kali kamai ban leit sha Khyndailad bad ïewduh kum ka lad ban pynduna ïa ka jingdheng kali.
“Kane ka jingleh ka sorkar ka long ka jingñiewbeiñ bad lehbeiñ ïa ki baduk ha ka imlang ka sahlang kiba hap ban shaniah ha ki kali kamai kum ka lad ban kamai jakpoh bad ban poi sha ki jingleit jong ki,” la ong u nongaiktien ka VPP, u Dr Batskhem Myrboh lyngba u kyrwoh khubor.
U la ong ruh ba ka long ka bym lah ban pdiang ïa kum ka jingleh kane ka sorkar ban kynnoh ïa ki baduk ba ki dei ka daw jong ka jingeh jong ka jingdheng kali ha ka nongbah Shillong.
Ha ka jingshisha, u Dr Batskhem u la ong ba ka sorkar ka la dei ban tehlakam ïa ka jingpyndonkam palat ïa ki kali shimet ha ka nongbah Shillong bad ban pynshlur ïa ki kali kamai. Hynrei, u la ong kane ka sorkar ka shim pynban ïa ki rai khongpong ba ktah ïa ka kamai kajih.
Ngi tip baroh ba ka jingwan jong ki kali na kiwei pat ki jylla ka dei ka dawbah ba wanrah ïa ka jingkhapngiah ha ki thaiñ Khyndailad bad Ïewduh. Ngi dei ban kynmaw ba kine ki kali bar jylla ki wallam tang khyndiat ka jingïohnong sha ka pla tyngka jong ka sorkar,” u la bynrap.
Shuh shuh u la ong ba kane ka sorkar khawpud kam nud ban shim ïa ka rai ban wanrah ïa ka jingbha ha ka imlang sahlang. Lada ka ktah ïa ki heh ki haiñ (high level) hynrei kam salia ban shu shim ki rai khlem kynjoh ktien na kito kiba shah ktah pat na ka rai jong ka sorkar lada ki dei ki barit baria.
“Ki khun samla ha ka jylla kin dang trei aïu shuh?” u la kylli.
Ka dei ka kamram jong ka sorkar ban pynthikna ba kan don ka jaka ïeng kali ba thikna ïa ki kali kamai ban pynhiar bad pynkiew ïa ki nongleit nongwan na ka bynta ka jingbiang lang jong kiba bun, u la ong,
Kumta ka VPP ka la dawa ïa ka sorkar ba ka dei ban weng mardor ïa kane ka aiñ ïakjakor kaba ktah ïa ki paidbah.
