Sepang, Jylliew:
Na ka liang jong ka synjuk ba ha khlieh duh jong ka jingialehkai Badminton ka pynbna paidbah halor ka jinglah jong ka mynta ban plie noh ia ka jynkhang ba ka lah khang baroh shi katta ia ki nongialehkai ka ri Russia bad Belarus, ba kin wanphai biang sha ki lympung ialehkai kum kiba long pdeng (Neutrals). Kane ka wan hadien ba ia ki nong-ialehkai jong kitei ar ri lah khang ban shim bynta ha kino kino ki lympung ialehkai halor ka jinghiar thma ka ri Russia pyrshah ia ka Ukraine kaba la dep shi snem tam mynta.
Katei ka jingkhmih lynti jong ka synjuk halor katei ka bynta ka wan urlong mynta ha ryngkat bad ka lympung ialehkai Olympic 2024 ka ban sa long ha Paris ka dang sah mynta sa shisien na ka bynta ban pynlong ia ka bad ruh ba ki federation bapher bapher jong ka kam ialehkai ki dang iaisah mynta ha ka jingialeh ha kaba kaei kaba ki dei ban leh mynta ia ki nongialehkai na kitei ki ar ri.
Kumba ka paw hi ka long ba ka Badminton World Federation (BWF) naduh u bnai Lber jong u snem ba lah dep ka lah khang pyrshah ia ki nongialehkai jong kitei ki ar ri ba kin shimbynta ha kino kino ki lympung iakhun bad ha u bnai Iaiong ka lah nang pynjrong shuh shuh ia ka jingbym shah shimbynta ka jong ka ia ki nongialehkai; naba ka jingthombor jong ka ri Russia pyrshah ia ka Ukraine ka lah nang jrong mynta kat shaduh ka jingkynjoh sha u snem ba-ar.
Hynrei na ka liang jong ka BWF ka iathuh ba ka iaid thik-pa-thik katkum ki kyndon ki jong ka bad ka jingpyntreikam ruh ia ki katto katne kiba ka lah pynkhreh ha ka jingpyntyllun ia ka kam na ka bynta ban shah ia ki nonialehkai jong kitei ki ar ri ba kin ai aireng ha ki lympung kum ki INA (Individual Neutral Athletes).
Kumba ka paw haduh mynta ka long ba ki nongialehkai jong kitei ki ar tylli ki ri ki lah mad ia ka jingeh kaba khraw ha ki halor ka jingshah pynshitom ka jong ki na kiba bun tylli ki jait jingialehkai ha ki synjuk bapher bapher naduh ba ka Russia ka lah hiar thma ia ka Ukraine.
Hynrei ha u bnai Lber jong une u snem ba mynta, ka IOC ka lah kut jingmut na ka bynta ban khot biang ia ki nong-ialehkai na kitei ki ar ri ba kin phai biang sa shisien sha ka kam ialehkai jong ki ha ki lympung ialehkai bar-ri, khlem kano kano ka jingpynpaw pat ia ka jinglah ban urlong ruh halor ka jingdonbyntalang ka jong ki ha ka Olympic 2024 ha Paris.
