Shillong, Jylliew 04:
Ki khynnah ïalehkai badminton shynrang bad kynthei jong ka Tramline Badminton Academy ki la mih na ka jylla ban leit ïashim bynta ha ka lympung ïalehkai Badminton ba la tip kum ka 66th National School Games ka ban long ha Gwalior, Madhya Pradesh.
Kane ka lympung ha Gwalior kan long bad sdang naduh ka 8 haduh 12 tarik mynta u bnai bad na ka liang jong ki khynnah kiba la mih ha ka sngi U Blei ki la long kiba la pynkhreh bha ïa lade na ka bynta ban ïakhun tyngeh bad ban wanrah nam bad burom ïa ka academy bad ïa ka jylla hi baroh kawei.
Na ka liang jong ka Tramline Badminton Academy ka la kitbok kitrwiang ïa u Manager Bah Kiefer W Shullai, coach samla Eranecles Syiem bad kumjuh ruh ïa ki Khynnah kiba leit ïa shim bynta ha kane ka lympung.
Ki khynnah ha ka liang ki shynrang ki ban leit ïashim bynta ki long u Pratham Majumdar, Mewanpyntngen Shadap, Akshit Upadhya bad u Aaron S Momin. Katba ki khynnah kynthei pat ki long ka Sneha Chettri, Geryma I Nongkhlaw, Ibapynhunshisha Kharbani, Shimti Lyngdoh bad ka Netania T Tariang.
Kine ki khynnah ki la mih na kane ka jylla ha ka sngi U Blei, bad kin sa mih madan ban ïakhun ha katei ka lympung naduh ka 8 tarik, ban ïakhun pyrshah ïa kiwei pat ki khynnah na ki skul bapher bapher jong ka Ri, ki ban ïashim bynta ha kane ka lympung, kumta kan long shisha kaba eh bad jwat bha hynrei la kyrmen skhem ba kin lah ban ïalehkai bha bad poi sha ka thong.
