Paris, Jylliew 04:
U Lionel Messi bad u Sergio Ramos ki la mad ïa ka nam rem ha ka jingïalehkai kaba khatduh na ka bynta ka club Paris St-Germain (PSG) kaba la ïoh ban rah ïa ka nam lahduh jong ka lympung Ligue 1 ha France.
Ha kane ka jingïalehkai kaba khatduh, ka PSG ka la mad ïa ka nam rem da 3-2 kol hakhmat ka Clermont kaba la pyndep ha ka kyrdan phra ha ka miej ïakheiñ dor-thong (point).
Haba phai sha ka jingïalehkai, u Ramos uba dei u rangïalehkai dien u la ïoh ban khyrwit ïa ka kol kaba nyngkong bad u Kylian Mbappe u la ïoh thep ïa ka kol ba ar.
Hynrei wat hadien ka jingshah thep 2 kol, ki rangïalehkai ka Clermont kim shym la duh mynsiem bad ban ïakhun tyngeh, ha kaba u Johan Gastien u la ïoh ban pynphai ïa ka kol kaba nyngkong, u Mehdi Zeffane u la ïoh ban pynïakhaid bad u Grejohn Kyei u la ïoh ban thep syndon ïa ka kol jong ka jingjop.
Ha kane ka jingïalehkai, u Messi naduh ka por ba u la mih sha madan, u la shah beiñ ha ki paid nongkyrshan ka PSG bad imat namar kane, um shym la lah satia ban pynkhih jar ha kaba u la pynlehnohei ïa kiba bun ki kabu ksiar. Ka kontrak jong u Messi bad Ramos kan kut noh mynta ka aiom bad kine baroh ar ki la pynkhreh ban mih noh na kane ka club.
Ka club na Saudi Arabia ka Al Hilal bad ruh ka Inter Miami kaba don ha ka lympung Major League Soccer, ki la long ki ar tylli ki club kiba lah ban long ka jaka ba u Messi u lah ban poi.
Ha kane ka jingïalehkai, baroh ki rangïalehkai ka PSG ki la phong ïa ka sopti kaba la thoh ka kyrteng jong u Sergio Rico ryngkat ki number kaba dei ka jong ki. U Rico uba dei u nongap kol ka Paris St-Germain u la don ha hospital namar ka jingmynsaw ha ka por ba u hap nalor u kulai bad wat na ka liang jong ki nongkyrshan ruh ki la rah ïa ka banner ban ai burom bad kitbok shwa ban sdang ka jingïalehkai.
Ka kol kaba u Kylian Mbappe u la ïoh thep ha ka jingïakhun pyrshah ïa ka Clermont ka la ïarap ïa u ban khur ïa ka khusnam Golden Boot jong kane ka lympung. U Mbappe u la dei tang u rangïalehkai ba saw ban ïoh thep bun kol eh ha France ha ki san sien kynthih, kaba la pynïaryngkat ïa u bad u Carlos Bianchi, Delio Onnis bad Jean-Pierre Papin.
