Agartala, Jylliew:
U MLA barim jong ka jylla Tripura uba dei ruh u nongïalam jong ka seng saiñ pyrthei TIPRA Motha – Rajeswar Debbarma ha ki khyndiat sngi kiba la leit noh u la phah da ka shithi sha u Myntri Rangbah ka jylla – Dr Manik Saha ban dawa na u ban pynrung noh da ki dak Roman na ka bynta ka ktien Kokborok.
Ha ka shithi, na ka liang u Debbarma u la pyntip ha u Myntri Rangbah ba ki paid nongshong shnong trai muluk jong ka jylla Tripura ki don ïa ka jingthrang kaba khraw ban pyndonkam noh da ki dak thoh Roman na ka bynta ka ktien Kokborok. Ha ka shithi, u Debbarma u la pashat jingmut ruh halor ka Bill kaba la pyllait da ka TTADC ha u snem 2000 bad halor ka Bhasha Commission – kiba la ai jingmut na ka bynta ban pyndonkam noh da ki dak thoh Roman na ka bynta ka ktien Kokborok. U la pyntip shuh shuh ba ïa ka ktien Kokborok yn lah ban tang ban pyndonkam ha ka thoh ka tar lyngba ki dak thoh Roman.
Na ka liang u Debbarma u la kyrpad ruh ïa u Myntri Rangbah ka jylla ha kaba ïadei bad ki jingkylli eksam ha ki skul sorkar bad ki skul ba ïoh jingïarap na ka sorkar (Klas VI – Klas XII) ba dei ban pynkhreh ïa ki jingkylli eksam da ki dak thoh Roman na ka bynta ka sobjek Kokborok. U la pyntip shuh shuh ba tad haduh kane ka kynti kaba mynta ïa ki jingkylli eksam ha ka sobjek Kokborok na ka bynta ki kolej bad skulbah la pynkhreh lyngba 2 jait ki dak thok, kata, da ki dak thoh Roman bad Bengali.
Na ka liang u Debbarma u la buh ruh ïa ka jingkyrpad ha u Myntri Rangbah ba un leit rah ïa katei ka mat bad ka CBSC na ka bynta ka bha ka miat jong ki samla pule kiba dei ki nongshong shnong trai muluk jong ka jylla – ban pynkhreh ïa ki jingkylli eksam da ki dak thoh Roman.
Ha ka jingpynkut jong ka shithi, na ka liang u Debbarma u la pynpaw ïa ka jingkyrmen bad ka jingngeit skhem ba u Myntri Rangbah un lah ban shimkhia halor katei ka mat na ka bynta ban pynurlong ïa ka jingthrang jong ki nongshong shnong trai muluk jong ka jylla Tripura.
