Nongstoiñ, Jylliew 04:
Ka long kaei kaei kaba sngewshyrkhei bad kaba pynsuhjer ïa ka imlang sahlang ha kaba hadien ka jingkem noh jong ki pulit ka thanad Nongstoiñ ha ka 31 tarik Jymmang 2023 ïa uwei u briew ïa uba la kynnoh ba u la leh be-ijot ïa uwei u khynnah na kawei na ki shnong ha West Khasi Hills, ka jingbuddien bad jingtohkit da ka Dorbar Shnong jong kata ka shnong ka la pynsuba ba ki don sa 22 ngut ki khynnah kiba la ngat ha ka jingshah leh be-ijot ha utei ujuh u briew katba 15 ngut pat u la pyrshang ban leh be-ijot.
Ïa kane la pynpaw da ki nongïalam shnong katei ka shnong haba kren bad ki nongthoh khubor ha ka Sngi Saitjaiñ hadien ba katei ka shnong ka la pynlong ïa ka dorbar paidbah da ka jingwan ïashim bynta ruh da baroh ki longïing bad ki nongshong shnong jong katei ka shnong.
Ban pyntikna shuh shuh halor katei ka jingjia ka dorbar ka la pynlong ïa ka jingtohkit bad ka la khot ïa kawei-pa-kawei ka longïing ban wan shakhmat ban pyntikna ki don briew katno ngut shi ïing bad la ki la don ne em ki khun kiba la ngat ha katei ka jingjia ha utei u briew.
Shuh shuh ha katei ka sngi ka dorbar ka la shim ruh ïa ka rai ban pynrem jur ïa utei u briew, bad ka la rai ban pynlong ïa ka ‘rally’ ban pynrem ïa kaei kaba la jia.
Katkum ka jingïathuh jong u Sordar jong katei ka shnong, nyngkong la lap ba ki la don 15 ngut ki khynnah na ka shnong ba la suba ba ki la shah leh be-ijot ha utei ujuh u briew. Hynrei u la ong ba na ka dorbar ba la pynlong hynnin ka sngi, la lap ba ki la don shuh sa hynñiew ngut ki khynnah kiba la ngat ha kajuh ka apot.
Nalorkata, u Sordar u la ong ba ki don sa 15 ngut ki khynnah kiba utei ujuh u briew u la pyrshang ban leh be-ijot.
Lah ban kdew hangne ba ka jingkem jong ki pulit ïa utei u briew ka dei hadien ba ki la ïoh pdiang ïa ka jingujor na kawei ka longkmie ïa kaba la buhrieh kyrteng na kawei ka shnong hapoh West Khasi Hills halor ka jingshah leh be-ijot u khun jong ka ha uwei u briew
Utei u briew uba la shah kynnoh leh ïa katei ka kam pohjait u dei uba la tip kyrteng kum u Mebanrilang Syiem Shangoi na kawei ka shnong kaba hap hapoh West Khasi Hills. Katei ka jingjia ka la jia naduh u snem 2022, hynrei katei ka longkmie ba la ujor ka dang tip ha ka 29 tarik Jymmang hadien ba u khun jong ka u la ïathuh ïa kaei kaba la jia ïa u.
Kum ban shu pynkynmaw hadien ba ki pulit ki la kem noh ïa utei uba la suba leh be-ijot bad nangta la pynkit noh ïa u ban set patok ha Shillong.
