Shillong, Jylliew 04:
Ka jingpynmih hukum na ka shlem treikam Deputy Commissioner ban pynïaid pud sngi ne Odd-Even ïa ki taksi kamai ka ban sdang naduh lashai ka sngi (Lah Sngi U Blei) ban leit sha Khyndailad bad Motphran kum shi bynta ban pynduna ïa ka jingdheng kali ka la pynlong ïa ki nongñiah taksi ha sor Shillong ba kan mih ar sur. Na kane ka hukum, kawei ka kynhun ka pdiang bad kawei pat kan ïaid beit shakhmat ban pyrshah ïa katei ka hukum.
Kawei ka kynhun ka ban ïaleh pyrshah ïa kane ka hukum jong ka Deputy Commissioner, East Khasi Hills District ka dei ka synjuk ba la tip kum ka East Khasi Hills Local Taxi Welfare Association (EKHLTWA) hapoh ka jingïalam u Bah Wandonbok Jyrwa kum u President.
Katba kawei ka kynhun ka dei ka Synjuk Nongñiah Taxi Sor bad Khapsor hapoh ka jingïalam u Bah Shimladlang Rynjah kum u Vice-President kaba la rai ban pdiang ïa kane ka hukum kumba ka DC ka la kyrpad ba kan pyrshang hapoh kane ka shi taïew.
Haba ïakren bad u Bah Wandonbok Jyrwa uba dei u President ka EKHLTWA, u la ong ba ka seng ka la rai ban ïaid beit shakhmat ban kamai shaduh Khyndailad bad Motphran namar ki sngewthuh ba kan ktah ïa ka kamai kajih jong ki nongñiah bad kan buh jingeh ruh ïa ki nongleit nongwan lada pynhiar shiteng lynti.
U la pyntip ba ka seng kan dang buddien lashai na ka bynta ban leit ujor mukotduma pyrshah ïa ka jingpynmih hukum ka DC.
Haba ïakren bad u Bah Shimladbiang Rynjah uba dei u Vice-President ka SNTSK, u la ong ba ka seng ka la rai ban ïatreilang bad ka DC kumba ka la kyrpad ba kan pyrshang tang shi taïew.
U la ong ba hadien shi taïew lada kane ka jingpyrshang kan ktah ne kam ktah kan sa shong pyrkhat biang.
Shuh shuh u la ong ba kane ka jingïatreilang bad ka DC namar ka la pynpaw ba kam lah leh eiei namar ka ïoh hukum na ka ïingbishar. Hynrei, lada hapoh kane ka shi taïew ka la pyrshang kan sngap ïa ka jingujor na ki paidbah lada ki shem jingeh haba ki shah pynhiar tang shiteng lynti.
Kum ban shu pynkynmaw kane ka jingpynmih hukum ka DC ban ïaid odd bad even ïa ki local taxi ban rung sha Khyndailad bad Motphran ka long ban pynkylluid ïa kine ki artylli ki ïew kiba heh ha Shillong ka ban sdang treikam naduh lashai ka sngi ka 5 tarik Jylliew, 2023.
Wat la ym pat tip tikna naei ka lad kaba ki pulit kin peit ïa ki kali kiba ïaid ‘odd bad even’, hynrei ki lad kiba dei ban rung sha Khyndailad ki pulit kin ap ha pyrshah ka shlem treikam DC. Katba ki lad ban rung sha Motphran kin ap na Petrol Pump Anjalee bad ha Jaïaw namar ki lad kiba wan na Mawlai.
