Barpeta, Jylliew:
Ki bor sorkar jong ka jylla Assam ha ka 2 tarik mynta u bnai ki la pyntip ba 2 ngut ki runar ki la leit ban ther kuli ha ka Customer Service Point jong ka State Bank of India kaba don ha ka kyntoit Shakti Nagar, Barpeta ha ryngkat ka jingthmu ban leit lute na katei ka jaka kynshew pisa.
Kat kum ki jingïoh lum jingtip la ïathuh ba ha katei ka sngi, ki la don 2 ngut ki runar kiba la leh mynleh kum ki nongthied nongpeit kiba la leit rung ha katei ka CSP bad synreit kuli hapoh ha ryngkat ka jingthmu ban lute pisa na katei ka jaka.
Ha katei ka jingjia la ïathuh ba ïa uwei napdeng kitei ki runar la ïoh ban bat da ki ‘riew paidbah kiba la ai ruh da ka jingsneng kaba tyngeh tad haduh ba la hap ban leit rah sumar noh ïa u sha kawei ka hospital kaba marjan. U runar u ba la shah shoh shah dat ha ki riew paidbah u dei u ba la tip kyrteng kum u Fazal Ali – nongshong shnong ka thaiñ Adabari, Kamrup district. Ha katei ka jingjia la ïathuh ba uwei pat u runar u la lait phet da ka said na katei ka jaka.
Ïa u Fazal Ali la leit ban rah sumar sha First Referal Unit kaba don ha Barpeta Road bad hadien la leit ban pynkynriah noh sha Barpeta Medical College and Hospital na ka bynta ki lad jingsumar kiba kham janai.
Kat kum ka jingïoh lum jingtip na u nongpynïaid ïa ka CSP – Shah Alam u la ïathuh ba katei ka jingjia ka la jia ha ka por ba ma u bad ki nongtrei jong katei ka CSP ki dang pynkhreh ban khang noh ïa katei ka jaka trei kam. Na ka liang u Shah Alam u la pyntip shuh shuh ba kitei ki runar ki don ïa ka jingthmu ban wan lute ïa ka pisa kaba la kot palat T.3 lak kaba don ha katei ka shlem trei kam.
Halor katei ka jingjia, na ka liang ki bor pulit jong ka thaiñ Barpeta ki la dep ban pynrung da ka mokotduma na ka bynta ban pynlong ïa ki jingtohkit kiba dang sah bad kumjuh ruh na ka bynta ban ïoh kem ïa u runar u ba la lait phet da ka said.
