London, Jylliew:
Na ka liang jong ka Sarina Wiegman kaba long ka nongpyniaid khlieh duh jong ka kynhun ialehkai phutbol ki kynthei ka England ka pynbna mynta ia ka thup kyrteng jong ki thei ialehkai kiba lah shah jied na ka bynta ban ia aireng ha ka FIFA World Cup 2023.
Kumta ruh katei ka nongialehkai kaba lah rah ia ka trophy jingjop ha ka European Championship jong ki kynthei ha u snem ba lah dep, mynta ka kynti yn sa ialam nakhmat ia ka kynhun da ka defend jong ka klob Chelsea ka Millie Bright ha kaba ka tei ka nogialehkai ka lah shim ia ka kyrdan kum ka kapten jong ka kynhun na ka daw jong ka jingshitom bad jingmynsaw jong ka Leah Williamson ka ban ym lah ban shimbynta ha ka lympung. Shuh shuh ruh ka Lucy Bronze bad Alex Greenwood ki long napdeng ki 23ngut ki thei ialehkai ia kaba lah pynbnalang ia ka kyrteng jong ki mynta haka thup bad ha kaba ki la pynkhreh ruh na ka bynta ban shimbynta ha ka sien kaba lai jong katei ka lympung ialehkai ka ban wan. Kumjuh ruh kitei ki arngut ki long shibynta jong ka kynhun baroh kawei kaba la lah ban khur ia ka takma Rnong ha u snem 2015. Kumjuh ruh ka khubor ka iathuh ba katei ka kynhun ialehkai ka iasam mynta ialade ha ka Group D ha ka jingiadonlang ka kynhun ialehkai na Haiti, Denmark bad China.
Katkum ka khubor ba lah ioh lum ka iathuh ba katei ka lympung ialehkai mynta snem la dep ruh ban pynskhem ia ka sngi bad tarik ha ka ban plie pyrda ia ka naduh ka 20 tarik u Naitung haduh ka 20 tarik u Nailar ha ri Australia bad New Zealand.
