New Delhi, Jylliew:
Ha ka European Leg jong ka lympung ialehkai Hockey kaba mynta ka FIH Pro League ki shynrang, ka khubor ba lah ioh lum ka iathuh ba u kapten jong ka kynhun ialehkai na India u Harmanpreet Singh u la lah ban kamai kol jingjop bad pynlong ruh ia la ka kynhun ban lah pynliem syndon noh ia ka kynhun iakhun pyrshah kaba long ka lahduh Olympic ka Belgium da 5-1 kol.
Kumta ha katei ka jinglah jong ka kynhun ban khur ia katei ka jingjop, ka khubor ka iathuh ba ka kynhun baroh kawei ka la lah biang mynta ha ka ban khyllie ialade na ka jingshah rem sha ka lynti jingjop.
Shuh shuh na ka jingialehkai baroh kawei bad ba ka India ka la lah ban kamai ia ki tei ki san kol, ka khubor ka iathuh ba dei lyngba u rangialehkai shapdeng ka kynhun u Vivek Sagar Prasad uba lah ai nyngkong sha ka kynhun ia ka jingtam kol shakhmat ha ka minit ialehkai ba nyngkong; ha shuwa ba u Harmanpreet un lah ban khur ia ki ar kol ha ka 20 bad 29 min na ka PCs (penalty corners). Kumjuh ruh ha katei ka jingiakhun, u Amit Rohidas u la lah ban khur ia ka shi kol ha ka 28min ialehkai bad u Dilpreet Singh ha ka 59min ialehkai kiba long kiwei pat ki nongkamai kol ka kynhun. Ha kaba iadei bad ka kol ba lah khur da katei ka kynhun iakhun pyrshah ha ka jingiakhun ka long lyngba ka kol na u William Ghislain ha ka 45 min ialehkai ha ki minit ialehkai ba shakhmat jong ka quarter iakhun kaba saw.
Ka khubor ka iathuh ruh ba ka India kaba la lah wan sha ka ri Europe kum ka kynhun ialehkai kaba hakhliehduh ha ka miej khein dor-thong jong ka Pro League, ka lah mad noh ia ka jingshah rem ha ka jingialehkai sdang jong ka European Leg ha katei kajuh ka kynhun iakhun pyrshah da 1-2 kol ha ka 26 tarik u Jymmang; ha shuwa ba kan mad biang sa shisien ia ka jingshah pynrem ha ka Great Britain da 2-4 kol ha ka sngi kaba bud.
