Jowai, Jylliew 04:
Ban wanrah ïa ka shongsuk shongsaiñ ha ka thaiñ khappud jong ka West Jaiñtia Hills bad West Karbi Anglong District, ka Jaiñtia Students’ Movement (JSM) bad Karbi Students’ Association ki la pynlong ka jingïakynduh lang ha Karbi Hemtun, 6th Mile Guwahati ha ka Sngi Saitjaiñ.
Ha kane ka jingïakynduh lang la don lang u President ka JSM u Bah Leningstar Rymbai, u President ka KSA u Jemson Timung, ki Secretary bad ki dkhot jong kine ki ar tylli ki seng.
Ha kane ka jingïalang la ïakren halor kumno ban wanrah biang ïa ka shongsuk shongsaiñ hapdeng kine ki ar jaitbynriew – ki Pnar bad ki Karbi – ha ka thaiñ Khanduli.
Ki dkhot kiba ïashim bynta ha ka jingïalang ki la pynpaw ïa ka jingkmen ha kaba ïadei bad ka jingshimkhia ka JSM bad KSA ban pynjem ïa ka jingeh ha ka thaiñ khappud jong ka Meghalaya bad West Karbi Anglong kaba la ktah ïa ka jingïadei jong ki nongshong shnong ha katei ka thaiñ.
La ong ba ki Karbi bad ki Jaiñtia naduh ki por mynshwa ki don ka jingïadei kaba ïajan bad donkam ban pynneh pynsah ïa kane ka jingïadei. Kine ar seng ki la rai ruh ban ïatreilang na bynta ban wanrah biang ïa ka shongsuk shongsaiñ.
Hadien ka jingïakren kaba sani bha, ki ar seng ki la shim ïa ka rai ban thaw da ka Peace Committee ban ïakren ïa ka jingeh jong ki ar jaitbynriew.
